Kiba bun ki jait jingshoh ki dei kiba la pyndonkam na ka bynta ka jingmad kaba bang halor ki jingbam ba ngi shet bad ba ngi bam. Ki don ki jait jingbam kiba ym don jingmad satia khlem da kynthup ban ber kine ki jingshoh. Hynrei phi donkam ban tip ba kine kim dei satia tang ka kamram jong kine ki jingshoh hynrei ki dei kiba kham palat ka bor ba ki don ban ïa kaba ki paw lait na ka jingmad ban pynbang ki jingbam jingdih.
Ki don bun ki jingshoh kiba don ha ki kamra shet jongphi kiba paw ba ki lah ban ai jingmyntoi kham bun ha ka liang ka koit ka khiah ba kynthup ruh ka jingmyntoi na ka bynta u klongsnam.
Kine harum ki long napdeng ki kynja jingshoh kiba lah ban pynneh ka koit ka khiah u klongsnam :
U Sying : Ka gingerol ka compound kaba don ha u sying ka dei kaba lah ban ai jingmyntoi shibun ha ka liang ka koit ka khiah. Ka Gingerol ka dei kaba don ka analgesic, sedative, antipyretic bad antibacterial bad ba dap da ka jingdon ki antioxidant. Ka jingkynthup kham bun u sying ka dei kaba lah ban pynduna halor ka jingdon ka cholesterol kaba sniew kaba lah ban buh jingma halor ka koit ka khia u klongsnam.
U Sohmynken : Lait na ka jingpynbang sat ha ka jingber ha ki jingbam ba phi shet, kine ki dei kiba pynkhlaiñ ruh ka bor met na ka daw ka jingdon ka vitamin C bad kiwei de ki bynta kiba lah ban pynbiang halor ka jingdon ka blood pressure.
Ki shyieng seleri : Kine ki shyieng ki dei kiba ju kynthup ha ka jingshet ka sha kynbat kine ki shyieng la tip ruh ba ki lah ban tehlakam halor ka jingkiew ka jinglong tyrha bad ka jingkiew ka blood pressure.
U snepdieng sia sia : Ngi ju sngewtynnad ban kynthup bad ber une u snepdieng sia sia ha ki jingtah a ngi shet. Une u snepdieng u dei uba jur ban don ki antioxidant bad ki anti-inflammatory properties, ba lah ban ai jingïada na kiba bun jait ki jingpang, ba kynthup ruh ka jingpang ba ktah ha u klongsnam.
U elaichi : Une u dei uba ju shet ha kiba bun ki jingtah bad la ju pyndonkam ruh na ka bynta ban shet sha, u jur ka jingsma iwbih bad ka jinglong thiang ba kham pynjur ka jingmad. Une u kynja jingshoh u dap da ka jingdon ka vitamin A, vitamin C, calcium, iron, zinc bad kiwei de ki nutrient kiba lah ban ïada na ka jinglang tylli ka snam bad kyntiew ka koit ka khiah u klongsnam.
U Rynsun : U Rynsun u dei uba lah ban ai jingmyntoi shibun ïa kito ki briew kiba don ka jingpang klongsnam u dei uba dap da ka jingdon ki anti-microbial bad anti-oxidant properties hapdeng ba u don ki kynja compound ba la tip kum ka allicin. Ka jingbam rynsun manla ka sngi ka dei kaba lah ban pynduna ka jingdon ka cholesterol bad kumjuh ruh ka jingpaw halor ka jingdon ka shini.
Ka umphniang tyrso : Ka jingkynthup ban shet da kane ka umphniang ka dei kaba lah ban ai jingmyntoi shibun na ka bynta u klongsnam, kane ka umphniang ka riewspah ban don ka MUFA, kaba lahban pynbiang ka jingdon ka cholesterol bad ka jingdon ka fat ha ka snam, bad dei halor kane ka lah ban pynjanai halor ka jingtuid jong ka snam.
