Shillong, Jymmang 04: Ka Ïingkashari Meghalaya High Court hynne ka sngi balang kala hukum ïa ka Sorkar Jylla ban khang noh ïa baroh ki kali ba kit mar palat ïa ka 10 metric ton ba kin ïaid na ka jingkieng Umiam.
Ka Ïingkashari kala pynmih ïa kane ka hukum halor ka jingai jingmut ba ka jingkieng umiam ba mynta kan ym lah satia ban kyrda ïa ka jingïaid ki kali ba kit palat pud.
Kane kala mih ruh hadien ba ka Ïingkashari kala shimkhia ïa ka jingpynpaw ka National Highway Authority of India (NHAI) bad ka Border Roads Organisation (BRO) ba dei ban bujli noh ïa ka jingkieng Umiam da kawei pat ka jingkieng ba khlaiñ khnang ba kan lah ban ïai shan ïa ka jingïaid ki kali ba man ka sngi.
Ka BRO kala pynpaw ruh ha ka affidavit ba ym dei shuh ban shah ïa ki kali kiba kit palat ïa ka 10 MT ba kin ïaid na kane ka jingkieng.
Haba shong bishar ïa ka Public Interest Litigation (PIL) halor kane ka kam, ka Ïingkashari ki arngut ki Nongbishar ba kynthup ïa u Chief Justice Sanjib Banerjee bad u Justice W Diengdoh, kala ong ba ym don satia ka jingartatien ïa ka jingai jingmut ba kane ka jingkieng ha Umiam, ka lah ban nym lah kyrda ïa ka jingïaid ki kali heh ba khlem sangeh.
“Kane ka jinglong jingman ka dawa ba dei ban leh eiei noh mardor khnang ba kan nym dkut ka jingpyniasoh ïa ka Nongbah Shillongnamar ka jingbym don ka jingkieng da kawei pat ha kane ka pung” kala ong.
Ka Ïingkashari kala bthah ïa ka Sorkar Jylla ban pyrshang kat ki lynti ha kaban pynthikna ba kan don ka jingpyrkhat ïa ka jingkieng thymmai bad ban pyntrei ruh wut wut ïa ka khlem da ap haduh ban da khyllem ne twa kane ka jing kieng ba mynta.
“Ka Sorkar Jylla ka dei ruh ban phah pynïaid ïa ka rukom ïaid jong ki kali ha kane ka jingkieng khnang ban pynthikna ba ym tang ïa ki kali ba kit palat ïa ka 10MT ba ym shah ban ïaid hynrei ban ym shah ruh wat ban ïaid haduh artylli ki kali heh ha kajuh ka por kaba lah ban nang wanrah ïa ka jingsynjor” kala ong.
Ka Ïingkashari kala png ba ka sorkar ka dei ban shim ïa ki lad ki lynti kumno ban pynïaid ïa ki kali na baroh ar liang bad ruh ban nym shah ïa bun tylli ki kali ba kin ïaid ha kajuh ka por na ka jingkieng, haba buh ha ka jingmut jing pyrkhat ïa ka jingkhlaiñ bor jong ka jingkieng ban kyrshan”.
Ka Ïingkashari kala pynpaw ruh ba ka Sorkar Jyla ka lah ban leit ïakren bad ka Sorkar Pdeng ba kan iarap pyllait pisa khamtam ba kane ka jingkieng ka dei kaba pynjan eh ïa ka nongbah Shillong. Ka Ïingkashari kala buh ban shong bishar biang ïa kane ka mukotduma ha ka 1 tarik u Jylliew.
