Nongstoiñ, Nailar 05 : Na ka bynta ban teh song bad ban pynkhlaiñ shuh shuh ïa ka jingïalong kawei hapoh ka kur ka jait, ka Kur Snaitang Nongstoiñ zone ha ka sngi saitjaiñ ba la dep ka la pynlong ïa ka jingïalang ha MECOFED hall ha New Nongstoiñ. Ha u kyrwoh ba la pyllait da u Pastor K.G.Snaitang secretary ka Nongstoiñ zone, la ong ba ha shuwa ban sdang ïa ka jingïalang la duwai da u bah L.R.Snaitang.
La ong ruh ba katei ka jingïalang ka dei ka sien kaba ar ba ka Nongstoiñ zone ka la ïoh ban pynlong. La ong ruh ba ka jingpynlong ïa katei ka jingïalang ka dei namar ba katba nang mih ki sngi ka kur ka jait ka la nang roi ha ka jingbun paid.
Ha ka shongkha shongman ki shynrang ki la poi sha kylleng ki jaka ym tang hapoh shnong hynrei ha kylleng ka jylla, kumta lada ym lah ban tehsong bad pynïathuh ithaw da kaba kheiñ bniah katkum ka riti ka dustur ba la buh da ki long shuwa, ka lah ban ïatyngkhuh wat shi para kur ha ka shong kha shong man.
Nalor kata la ong ruh ba ha katei ka jingïalang ka kur ka la ïatai bad ïathir sani bha kumno ban pynsgewthuh ha ki khun ki kti, ba kin buh jingkynmaw ïa ka jingïadei bad ki kha ki man khnang ba ki pateng ban wan kin tip bad kin kynmaw ban burom ïa ki Kñi, ki kmie ki kpa, ki hynmen ki para ki dei ban ïa burom iwei ïa iwei pat.
Ha katei ka jingïalang la jied ruh ïa ki nongkitkam jong ka Executive Committee na ka bynta jong u snem 2023 haduh 2026. Ki nongkitkam kiba la jied ki long President Mr. Ratstarland Snaitang, Vice president Rev.K.B.Snaitang, Secreatary Rev K.G.Snaitang Asst secretary Mr Wislandar Snaitang, Treasurer Mrs Timocracy Snaitang.
Ki wei pat ki dkhot jong ka Executive Committee ki long, Mr Khaiñtliding Snaitang, Mr. Jimbus Snaitang, Mr. S.T.Snaitang, Mr Blorinly Snaitang, Mr L.R. Snaitang, Mr Bulbert Snaitang, Mr. Bibarwell Snaitang, Mrs Kweltinoris Snaitang, Mrs. Silinda Snaitang bad Mrs Isidora Snaitang.
