Nongstoiñ, Nailar 05 : Ka rep ka riang ne ri jingri ha kine ki sngi kam long shuh ka kam kaba pynmyntoi ïa ki paitbah, namar ka jinghiran palat ka pyrthei bad ki ïew ki hat ki la kynjah lut, nalor ba ki don ki daw kiba biang ba ki nongkhaïi ki ïoh lad ban khñiot ïa ka dor ka mur katba ki sngew bit.
Haduh kine ki sngi kumba 80% na ki nongshong shnong hapoh West Khasi Hills ki dei ki ba im da ka rep ka riang. Hynrei haba phai ha ki nongrep biskot, mynta u snem u dei u snem ba ha ki taïew ba dang shu sdang pynmih biskot, ka dor ka poi haduh hynriew phew tyngka shi kilo hynrei tang hadien shitaïew ka la hiar sha ka san phew bad ha kine ki sngi ka la hiar sha ka ar phew tyngka shi kilo.
Ha ka sngi saitjaiñ ba la dep la ïoh ban ïakren bad ki nongrep biskot, ha kaba ki la ong ba u biskot u dei u mar rep u bym ju neh ka dor ïew. Hynrei wat la ki tip ba u long kumta ruh kim banse ban trei shitom bad ban ïabeh ban rep, namar ïa kiwei pat ki jait mar rep kum u riew hadem, u kba, bad kiwei kiwei ym don jaka ban rep haduh ban da ïoh ban pynïaid ïew.
Ka kong A.Wahlang ka la ong ba shisien ba u biskot u la sdang ban hiar dor, man ka taïew ka dor ka hiar bad ha kane ka taïew kaba mynta na ka arphew tyngka u lah ban hiar sha ka shiphew tyngka. Ka la ong ruh ba ki don pat ki snem kiba u biskot u kiew dor biang hadien jong u bnai Nailur tangba tang tengkhat lano re ba kan long kumta.
Kiwei pat ki nongrep ki la ong ba lada ka dor kan dang hiar man la ka taïew kumba long mynta, kan kham bha ban shu ai bam sniang noh namar ha kine ki sngi man la ki shnong ki sniang ki la bun bha namar ym don shuh ki nong thied sniang. Ki la ong ruh ba wat la ki don teng khat kiba thied ruh, ka jingkhñiot ïa ka dor ka la long shaba palat kat haduh ba ki nongri sniang kim treh shuh ban die.
Ki nongri sniang ki la ong ruh ba ki sniang kiba ju die ha ka dor arphew hajar ha ki snem ba la dep ha kine ki sngi wat tang shiphew hajar tyngka ruh ki nongthied kim treh shim kumta ban ïa kaba die tad dor lah ba shu ri katba dang lah.
