Ha ki kyndon bamsap pynngat ka Lokayukta ïa u CEM bad ïa ki MDC barim ka GHADC
![](https://mawphor.com/wp-content/uploads/2023/08/Denang-T-Sangma.jpg)
Shillong, Nailar, 02: Ka Meghalaya Lokayukta, Shillong ha ka 28 tarik u bnai baladep ka la pynmih ïa ka hukum ba la pynngat hapoh ka kyndon Prevention of Corruption Act, 1988 (as amended) ïa u Chief Executive Member (CEM) barim jong ka Garo Hills Autonomous District Council (GHADC) u Denang T. Sangma bad ïa ki MDC barim kiba kynthup ïa u Augustine R. Marak, u Brilliant R. Sangma, u Dipul R. Marak, u Kurosh M. Marak, u Winnison Ch. Marak, u Dolly K. Sangma, u Bhupen Hajong, u Sukaram K. Sangma.
Nalor kine ki 9 ngut, ka Meghalaya Lokayukta ka la pynngat kyndon ruh ïa u Secretary jong ka GHADC u Hewingson A. Sangma bad ïa ki arngut ki Kontraktor kiba kynthup ïa u Sanjay A. Sangma bad ïa u Dolrish D. Sangma.
Kine ki la shah pynngat kyndon halor ka jingkynnoh donkti ha ka jyrsieh bamsap hadien ba u President jong ka Human Rights and Anti-Corruption Youth Power of India (HRACYPI) u Kingstone Bolwari Sangma u la mudui pyrshah ïa ki sha ka Meghalaya Lokayukta.
Ha ka hukum ba la pynmih da u Chairperson jong ka Meghalaya Lokayukta u Bah Bhalang Dhar, la bthah ïa u Director of Prosecution ban phah ïa ki case record sha u Public Prosecutor jong ka West Garo Hills, khnang ban ïoh pynsdang noh ïa ka jingtian bishar ha ka Special Court jong ka West Garo Hills.
Ha u kyrwoh ba la phah sha ki lad pathai khubor ha ka Sngi Balang, u Kingstone u la pyntip ba ha u snem 2021 u la mudui pyrshah ïa u MLA ba mynta jong ka NPP na Mahendraganj Constituency u Sanjay A. Sangma bad ïa kiwei pat halor ka jingbym trei pyndep ïa ka projek ban shna ïa ka Member Hostel ha Tura kaba kot T.6,01,31,100.00 klur bad ïa kane ka pisa la bhah lyngba ka Speocial Assistance jong ka Central Plan Scheme na ka bynta u snem 2015-2016 ha kaba ka Ministry of Finance ka la pyllait ïa ka pisa kaba kot T. 100.71 klur kum ka Grant-in-Aid sha ka GHADC ban shna ïa ka Schedule Tribe Areas.
U la ïathuh, ka Lokayukta kaba la pynlong ïa ka jingtohkit ba malu mala nyngkong eh ka la lap tyngkreiñ ïa ki jingduna ha kaba ïadei bad ka jingpyntreikam ïa kane ka projek bad mar mar la bthah ban pynlong ïa ka jingtohkit kaba bniah.
“Hadien ba la ïoh ïa ka jingbthah na ka Lokayukta u Anil Sangma, MPS (Rtd.) uba dei u dkhot jong ka Inquiry Wing jong ka Lokayukta u la pynlong ïa ka jingtohkit kaba bniah bad phah ruh ïa ka kaiphod tohkit sha ka Lokayukta bad katkum ka jinglap na ka kaiphod tohkit, ka Lokayukta ka la pynngat kyndon ïa ki MDC ba la kdew kyrteng haneng, ïa ki kontraktor bad ïa ki nongtrei jong ka GHADC,” la ong u Kingstone.
Hadien ba la ïoh ïa ka jingpynngat kyndon bad ïa ka kaiphod tohkit ba la phah da u Inquiry Wing jong ka Lokayukta, ka Special Court, Tura ka la pynmih ïa ka hukum ban shong bishar noh ïa kane ka kam ha ka 29 tarik, Nailar, 2023.