Bah khlieh hi ka sorkar ban pynlut ha ka jingpyntreikam ïa ka NEP ha ki college sorkar : Conrad K Sangma

Shillong, Nailar, 02: U Myntri Rangbah ka Jylla, Conrad K Sangma ha ka sngi Balang u la ong ba ïa ka National Education Policy (NEP) hap ban pyntreikam beit ha ka jylla bad mynta ka sorkar jylla ka dang pynkhreh ban pyntreikam ban ïoh pyntreikam ha baroh ki jaka pule jong ka sorkar.
Shuh shuh u la ong ruh ba ka sorkar kam lah satia ban shu phah leh salonsar lut ïa baroh hynrei kan pyrshang pat ban kyrshan ïa ki jaka pule ba kyrshan da ka sorkar ha kum katei ka por.
Haba kren bad ki lad pathai khubor, u Myntri Rangbah u la ong ruh ba ka NEP kadei kaei kaei kaba ka jylla ka hap ban pyntreikam bad kumta, baroh hi ki tip ïa ka jingshisha ba ka NEP kadei kaba bha na bynta ki samla pule.
“Kumta, halor katei ka phang ka la shai lypa namar ym don mano mano ruh ban pyrshah ïa ka NEP. Hynrei ki jingeh ban pyntreikam ïa ka khamtam haba ïadei bad ka jingdonkam briew, ki jingtei kidei kiba hakhmat eh kiba donkam. Kumta, kino ki jingpynkylla kiba hap ban leh kin don beit ki jingeh bad kumta, ngi ruh ngim da khmih lynti than eh ba baroh kin urlong lut shisien leh namar ngi sngewthuh ba kam dei satia ka kam kaba suk bad ba ki jingeh kin don beit,” u la ong.
Haba jubab halor ki jingkyrshan kiba ka sorkar kan ai ïa ki jaka pule khnang ban pyntikna ba ïa ka NEP yn lah ban pyntreikam ha Meghalaya, u Myntri Rangbah u la ong ba ka sorkar ka la shim lut ki sienjam kiba donkam na bynta ban pyntreikam ïa ka ha baroh ki college jong ka sorkar.
Tangba, u ong pat ba na bynta ki college deficit namar ba ïa ki la pynïaid laitluid da ki managing committee, hynrei ki ïoh pat ïa ka jingkyrshan na ka sorkar, kumta ka sorkar kan bteng ban kyrshan lang ïa ki ruh. “Ka jingkyrshan kan ïai bteng tangba ngin sa peit pat haduh katno ngin lah ban kyrshan. Namarba ki don bun bha kum kitei ki jaka pule, kumta ngin ym lah satia ban shu pynbna salonsar ba ngin leh lut na bynta jong ki,” u la bynrap biang.
U ong ruh ba na ka liang ki management committee bad ki college sponsor ki hap ban ïa trei lang ryngkat ryngkat bad ka sorkar ban pyntikna ba ïa ka NEP yn lah ban pyntreikam pura ha ki jaka pule.
Ha kawei pat ka liang, u Myntri Rangbah u la pyntip ruh ba ka tnad Pule Puthi jong ka sorkar jylla ryngkat ka skulbah NEHU kin sa shong pyrkhat bad kito ki college kiba pynïasoh bad katei ka skulbah ba ka long kaba donkma ban pyntreikam ïa ka NEP.