Tura, Jymmang 4 : Ki paidbah hapoh ka lama Joint Action Committee (JAC) jongka Phulbari bad Chibinang ki la pynlong da ka jingïaïaid paidbah ha ka 3 tarik mynta u bnai ban pynpaw ka jingpyrshah jur ïa ki bor pulit namaba kim kem satia ïa kiba haïing u MLA ka Phulbari u S.G Esmatur Mominin wat hadien ba la ujor da ka ejahar namar ki donkti ban shoh ïa ki lai ngut ki samla kiba dei ruh ki dkhot seng bhalang.
Ha kane ka jingïalang bad ïa ïaid paidbah la dawa ba ki bor pulit ki dei ban kem mardor ïa kine ki briew namar ki la long ki nongpynthut ïa ki briew da kaba ki byrngem bad shoh ïa kiba bun ki samla ha ka thaiñ Phulbari. “ Ngi dei ka jaka ba ïakhleh jaidbynriew ba don naduh ki Garo, Rabha, Hajong, Koch, Bodo, Mann, Bengali, Bihari, Muslim, Nepali bad ngi ïa im suk im saiñ hynrei lada kine ki briew ki ïai leh ïa kine ki kam pyntriem ngi sheptieng ïoh poi sha ka jingsngew ïapher jaidbynriew namar bunsien ki shoh beit tang ïa ki samla trai ri trai muluk” ong ki nongïalam ka JAC.
Ka JAC ka la ther ruh ïa u MLA SG Esmatur Mominin namar ka jingleh bym patiaw bad jingïada jongu ïa kine kiba haïing jongu kiba dei uwei u khun ruid u Bothu Sarkar bad kiwei pat ki dei u Rakiip Rahman bad u Hoju Bepari. La kynnoh ba kine ki briew ki ïaid laitlan sharum shaneng da kaba ki rah beit da ki tiar pynmynsaw kum ki wait khukri, ki tari, ki nar rod namar kim tieng ba ki ïoh jingïada na u MLA. Kumta ka JAC ka la rai ba lada ki pulit kim kem bad pynshitom ïa kine ki briew kan bteng beit ïa ki jingïakhih ba tyngeh nangne shakhmat.
