Tura, Nailar 01: Uwei u rangbah uba dei u nongrep ula duh noh ïa la ka jingim na ka jingshah hiar thma ha ki hati khlaw ha Ri-Lum Garo.
Kat kum ka khubor, kane ka jingjia ka la jia ha ka miet sngi Nyngkong ha ka shnong Kurung jong ka Pedaldoba kaba hap hapoh ka thaiñ Tikrikilla, West Garo Hills.
Ia une u rangbah la tip kyrteng u Milendro Momin ba 59 snem ka rta, uba dei u nongrep uba khmih ïa ki lyngkha kba lem bad arngut kiba haïing jong u.
Kine ki briew ki la ïohi ïa ka jingwan u hati ha ka por 1 baje eiei mynmiet bad ki la pyrshang ban beh ïa ki hynrei kane ka la pynbitar ïa ki hati kiba la beh kylla bad lap ïa une u nongrep bad kyrdem ïa u haduh da iap.
Kane ka jingjia kala jia marjan ka khappud ka Assam kaba dei ka jaka ba ju wan bha ki hati khlaw ban wad bam.
