Khliehriat, Naitung 31 : KKong Santa M Shylla, MLA ka Sutnga Saipung, ka kong Santa Mary Shylla, hynne ka sngi ka la phah da ka jingthoh sha u Myntri Rangbah ka jylla u Conrad K Sangma ba un tuklar lem ha kaba ïadei bad ka jingsniew jong ka surok NH6 naduh Mynkre shaduh ka shnong Malidor ha East Jaiñtia Hills.
Ka MLA lyngba une u kyrwoh ka la pynpaw ka jingsngewkhia kaba jur ha kaba ïadei bad kane ka rukom pyntrei ïa kane ka surok lyngba ka NHAI, bad pynpaw ruh halor ka jingkhih bitar jong ki paidbah halor kane ka jinglong jingman.
Ha kajuh ka por ka MLA ka thain ka la khot ruh na ka bynta ban pyntrei thymmai ban siang rong ïa kane ka surok kaba la julor palat pud bad kaba la wanrah ka jingeh kaba khraw ïa ki paidbah nongleit nongwan.
Kum ka nongmihkhmat ka thaiñ ka la leit ruh ban ïakynduh ïa u Symbud Myntri Rangbah ka jylla u Bah Prestone Tynsong ban kyntu ïa u ruh ban tuklar lem ha kaba ïadei bad kane ka phang.Halor kane ka bynta ka la ong ba na ka liang une u Myntri u la khot pynlong ïa ka jingïalang bad ki heh ophisar ka NHAI ban ïamir jingmut halor kane ka mat ha ka 2 tarik u Nailar 2023.
Ha kajuh ka por na ka liang ka MLA ka la kyntu ruh ïa u myntri rangbah ka jylla kumjuh ïa ka Myntri ka tnat ka koit ka khiah ka Kong Ampareen Lyngdoh na ka bynta ban kyntiew kyrdan noh ïa ka Umkiang PHC sha ka CHC, kumjuh ban plie ïa ka PHC ha Sumer Sirdarship bad ïa ka health sub centre hapoh ka shnong Hingaria.
