Sa kawei ka shithi pynsangeh NEP kular u Myntri ha ki samla pule ban pynher sha u VC NEHU

Shillong, Naitung 26 : Ka kynhun ki samla pule na ka skulbah NEHU hynne ka sngi ki la kynduh ïa u Myntri ka tnad Pule puthi, Rakkam A Sangma ban pynpaw ba kan ktah jur ïa ki samla pule lada jia ba pyntreikam noh mynta u snem ïa ka National Education Policy (NEP) ha ka jylla.
Haba kren bad ki lad pathai khubor hadien ka jingkynduh ïa u Myntri, na ka liang u President ka NEHUSU, Samla Readyfirstjune u la ong ba la pyntip ïa ki ba ka sorkar sa shisien kan thoh biang sha u Vice Chancellor ka skulbah NEHU halor katei ka bynta. “Na ka liang ka sorkar ki la pyntip ba ki la phah ar tylli ki shithi sha u VC ban ym pat pyntreikam ïa ka NEP mynta u snem namar kim pat long kiba la pynkhreh. Lada pyntreikam noh mynta kan buh jingeh ïa ki khynnah kumjuh ruh ïa ki nonghikai,” u la ong.
Shuh shuh utei u samla pule u la kynnoh ba la shu kwah pyntreikam kyrkieh ïa ka NEP watla ia ka jingpynrung klas na ka bynta ki Undergraduate ka la dep naduh ki bnai Jylliew.
“Hynrei na ka liang u VC u ong ban pyntreikam naduh ka 01tarik u Nailar katba ïa ka jingpynrung klas ha ki UG la dep naduh u Jylliew kumno mynta yn pynkylla noh ïa ka course kaba la dep ban pynmih ha ki prospectus. Lada kren ïa kata kamut ba ki khynnah ki hap ban siew tam ïa ka bai klas bad kumta kan buh jingeh bha ïa ki samla pule khamtam kito kiba wan na ki longiing kiba kham duna ka ïoh ka kot,” u la bynrap biang.
Na ka liang u Vice President ka kynhun u samla Easterson Sohtun u la ong ba u Myntri u la dep kular ha ki ba shen kin sa phah biang sa kawei pat ka shithi sha u Vice Chancellor ban pynsangeh shwa ïa kane ka jingpyntreikam ïa ka NEP.