Ka Sorkar kan pan jingmut na ki paidbah shwa ban shim ïa ka rai halor ka Rel: Conrad

Shillong, Naitung, 20: Da kaba kubur ba ka jingwan rung kyrthep jong ki briew kiba nabar ka dei ka mat kaba khia bha, u Myntri Rangbah ka Jylla u Conrad K. Sangma ha ka sngi Palei u la kular ba ka Sorkar kan pan jingmut na ki paidbah ba bun balang shwa ban ïaid shakhmat ïa ka projek lynti Rel ha rilum Khasi bad Jaiñtia.
Ha ka jingïakren bad ki lad pathai khubor, u Myntri Rangbah u la ong lada kiba bun balang ki sngew ba ka long kaba donkam ban tih bniah ïa ka jingwanrung kyrthep jong ki briew kiba nabar, ka Sorkar ruh kam don jingeh eiei ban leh ïa kata.
“Ka jingwad bniah kam don jingeh eiei hynrei ka jingwan rung kyrthep jong ki briew kiba nabar ka dei ka jingeh..Nga la kren da kaba shai sha ki paidbah ba ngin ym leh da ka bor ban shim ïa kane ka rai lada ki paidbah ba bun balang ki don ka jingsngewkhia. Ngin sa sngap shwa ïa ka sur jong ki babun balang shwa ban ïaid shakhmat,” u la ong.
U Myntri Rangbah u la ai ïa kane ka jingkynthoh halor ka jingai jingmut jong ka Seng Congress ban pynlong shwa ïa ka jing wad bniah halor ka jingrung kyrthep jong ki briew kiba nabar shapoh ka jylla Meghalaya hadien ba ka la mih ka jingpyrshah kaba jur na kiba bun balang halor ka jingtyrwa jong ka Sorkar ban wanrah ïa ka lynti Rel ha East Jaiñtia Hills District.
“Ha ka jingïakynduh ïa u Myntri ka tnat Rel, nga la ïathuh ïa u ba ki don ki jingpyrshah bad khlem da sngap shwa ïa ki jingsngew na kiba bun balang kam long satia kaba dei ba ngin shu leh da ka bor,” u la ong.
Shuh shuh u Sangma u la ïathuh ba u Myntri ka tnat Railway u la pyntip ba ka don ka pisa ba la ai sha ka Jylla na ka bynta ban siew bai lutksan ha ka bai jaka bad kiwei kiwei ki bynta kiba dei halor kane ka projek.
“Hynrei nga la kren da kaba shai hakhmat jong u, ynda la bthah bad lada pynlong shwa ïa ka jingtih bniah nangta yn sa lah ban wanrah ïa ka lynti Rel ha kino kino ki bynta jong ka jylla bad lada ka Sorkar India ka angnud, ïa kane ka pisa yn pyndonkam ban shna ïa ka Lynti Rel sha ki jaka kiba kwah khnang ban pynmyntoi hi ïa ki paidbah bad ba ki paidbah ki kmen ban don ïa ka lynti Rel,” u la ong bad bynrap, “u Myntri u la kmen ban ïohsngew ïa kane bad ong ruh ba ka jingpynkynriah noh ïa ka projek lynti Rel na Byrnihat-Shillong ha kaba ïadei bad ka jingpynlut pisa yn ai noh sha kiwei pat ki bynta jong ka jylla. Dei na kane ka daw ba ngi hap ban ïasylok shwa bad kiwei kiwei ki thaiñ shwa ban pynkynriah noh ïa ka projek lynti rel sha kiwei ki bynta jongka jylla.”
Haba kylli, u Myntri Rangbah u la ong, “nga ladep ïakren bad ka Sorkar India bad ngin ym ïaid shakhmat ïa kane ka projek, hynei ngi plie ïa ka jingkhang ba ka Sorkar India kan ïasyllok bad ka Sorkar Jylla bad kiwei kiwei de ki thaiñ bad ban peit kumno ngin pyntreikam ïa ka pisa na ka bynta kane ka jingthmu.”