Shillong, Jymmang 03: Ka jingïalehkai Basketball ha ka lympung Meghalaya Games 2022 kala jam sha ka semi-final bad ka jingïakhun kan long lashai ka sngi Balang (04-05-2022) ha Indoor Stadium ha NEIGRIHMS. Katba kiwei pat ki jait jingïalehkai kiba la sdang ha ka sngi Ba-ar ki kynthup ïa ka football, boxing, taekwondo, weightlifting, badminton, tennis, shooting bad ka archery.
Ka West Khasi Hills, kaba dei ka lahduh ha baroh ar ki kyrdan ïakhun (shynrang bad kynthei), kila rung sha ka semi-final. Ka kynhu ïalehkai jong ki kynthei kan ïakhun pyrshah ïa ka Ri-Bhoi ha ka por 12:15 nohphai sngi bad ka kynhun jong ki shynrang kin ïakhun pyrshah ïa kajuh ka kynhun na Ri-Bhoi ha ka por 2:45 baje janmiet. Ka West Jaintia Hills bad ka East Khasi Hills kin ïakhun pyrshah ha ka semi-final na baroh ar kynhun (shynrang bad kynthei) ha kaba ka kynhun jong ki kynthei kin ïakhun ha ka por 1:30 baje janmiet katba ki shynrang ha ka por 4 baje janmiet.
Ha ka football, kaba la pynlong ïa ka jingïalehkai ha ka Madan Heh, Mawlai bad ha SAI Centre, ka West Khasi Hills kala pynliem ïa ka South West Khasi Hills bad ka Eastern West Khasi Hills kala pynliem ïa ka West Jaintia Hills ha ki jingïakhun pre-quarterfinals jong ki kynthei. Baroh ar tylli ki jingïalehkai kila kut da kaba thep 2-0.
Ha Madan Hen kaba dei ka quarter-final kaba nyngkong, ka East jaiñtia Hills kala pynliem da 7-0 pyrshah ïa ka North Garo Hills, ha kaba ka Rushia Dkhar kala thep hat-tirck (33min, 50 bad 58min).
Ha ka liang ki shynrang ka East Khasi Hills kala pynliem da 13-1 kol pyrshah ïa ka South Garo Hills ha ka kyrdan ïalehkai U-21.
Ha Madanrting, ha ka jingïalehkai wushu, u Dorian Dean Nongrum u la khur ïa ka takma Ksiar ha ka kyrdan sub-junior boys kiba hapoh 42kg, ha kaba u Femi Rymbai u wan ba nyngkong napdeng ki nongïalehkai ha ka sub-junior kiba hapoh 36kg bad ka Marvisha Sohklet ha ka kyrdan sub-junior kiba hapoh 42kg. Ha kane ka jingïalehkai u Bah Pynïaid Sing Syiem u la long kum u Kongsan.
Ha kane ka sngi la sam ruh ïa ki khusnam na bynta ki nongïalehkai gymnastics ïa kaba la pynlong ha Indoor Training Hall, SAI, ïa kaba la sam da u Working President ka Meghalaya State Olympic Association u Bah John F Kharshiing, ha ka jingdon-lang ka Kong Matsiewdor War Nongbir Vice-President nalor kiwei kiwei. Ha ka sngi Balang yn sa sdang da kiwei pat ki jingïalehkai ba kynthup ïa ka athletics, cycling, karate, swimming bad ka table tennis.
