Nongstoiñ, Naitung 17: Mynta ka sngi ki bor shnong jong ka shnong Maweit lyngba ki khun samla, ki la ïoh ban wanrah noh ïa ka met ïap jong u bah Hubert Marthong u ba dei uwei na ki rawon u ba la shah rah ha ka umsaw shibnai mynshuwa.
La ong ba ïa ka met ïap la lap nyngkong eh da ki katto katne ngut ki nongleit khwai naduh mynnin ka sngi, ba ki la ïohi ïa ka met ïap kaba la per ha sla um bad kaba la pyut lut baroh shimet hynrei la shu ithuh noh tang lyngba u sñiuh.
La ong shuh shuh ba la lap ïa katei ka met ïap na ka jaka kaba la jngai kumba 9 kilometer pajih na ka jaka kaba u la jah ne shah rah ha ka um saw ha kine ki shibnai mynshuwa. Kiwei pat ki ar ngut ki lok kynthup ïa u bah Shilingbest Langrin bad u bah Kmenlang Nonglang bad kat haduh mynta dei satang ïa ka met ïap u Kmenlang Nonglang ym pat lap satia.
