Pynkup burom ka DS Jaïaw Laitdom ïa u Damebanmerbha S. Blah ba jop takma Ksiar na rynsan Karate ha New Delhi
Shillong, Naitung 17 : Ka dorbar Shnong Jaiaw Laitdom mynta ka sngi Nyngkong ka 17 tarik Naitung 2023 ka la ïoh ban pynkup burom ïa u samla Damebanmerbha S. Blah uba la jop ïa ka takma Ksiar na ka rynsan ïalehkai Karate jong ka India Open International Karate Championship 2023 kaba la long ha New Delhi naduh ka 17 haduh ka 18 tarik Jylliew 2023.
La pynkup burom ïa u samla Damebanmerbha S. Blah da ka jaiñ ryndia bad ka momento.
Ïa kane ka jingïalang pynkup burom la pynlong ha Ïing Dorbar jong ka Shnong, ha kaba la ïadonlang ryngkat ki Rangbah Shnong ba kynthup u Bah H.S. Marweiñ uba la shim ka bynta ban pynkup burom bad u Bah S.B. Kharbangar.
Nalor kitei ki Rangbah Shnong la ïadonlang ruh ki nongkitkam Shnong, u Bah H.S. Suting General Secretary, Bah H.T. Sten Adviser jong ka Jaiaw Umpohliew Block Committee, ki dkhot ka Executive Committee jong ka Dorbar Shnong, kmie kpa jong u samla Damebanmerbha S. Blah, u Bah Shngaiñborlang Syiemlieh, ka Kong Ailin Blah, kiba haiing hasem bad u coach u Bah Donboklang Lyngdoh.
Na ka liang ka Dorbar Shnong Jaïaw Laitdom ka la pynkup burom ïa une u samla uba la wanrah nam bad burom, ha kane ka sngi kaba dei ruh ka lyngkhuh sngi ïap ba 188 jong u Pa’iem Tirot Sing Syiem, u Syiem ka Hima Khatsawphra (mynshuwa) bad ka Hima Nongkhlaw (kaba mynta).
U Samla Damebannberbha S. Blah 16 snem ka karta u shong u sah ha Jaiaw Umpohliew, bad mynta u dang pule ïa ka klas XI ha skul BSF ha Umpling.
Ha kane ka sngi shuwa ban pynkup burom, la pynlong ka jingshngap jar kaba shi minit kum ka dak ka jingkynmaw burom ïa kane ka sngi khraw kaba dei ka lyngkhuh sngi ïap ba 188 jong u Pa’iem Tirot Sing Syiem u khlawait ka Jaitbynriew uba la ïaleh pyrshah ïa ka Sorkar Phareng ha ki spah snem kiba lah leit noh.
Ka Dorbar Shnong ka kitbok kitrwiang ïa u samla Damebanmerbha ba un nang kiew shaphrang ha ka kam ïalehkai bad ban pyndonkam hok ïa ka sap kaba u don. Ha kane ka sngi, na ka liang u samla Damebanmerbha u la pyni ruh halor ka rukom ïalehkai Karate kaba la pynshohbiej bad pynshongshit ïa ki nongïalam jong ka Dorbar Shnong.