Wan shakhmat u Michealsing, u Jinesfulson bad u Wonderful ha ka Full Marathon jong ka CYD ha Mawkyrwat

Mawkyrwat, Nailur 28: Ka Centre for Youth Development (CYD), Mawkyrwat lyngba ka jingkyrshan jong ka Tourism Department, Sorkar Meghalaya, ka la ïoh ban pynlong ïa ka Mawkyrwat Great Marathon IV, da ka jingthmu ban kyntiew ïa ki kam jingïalehkai, ka koit ka khiah bad ban pynshlur ïa ki samla ban shimbynta kham bun ha ki kam jingïalehkai hapoh ka South West Khasi Hills District.
Ha kane ka Mawkyrwat Great Marathon IV ki nongïashimbynta ki don baroh 330 ngut kata ki shynrang kiba la palat 18 snem ki don baroh 120 ngut ki nongïashimbynta, ki kynthei kiba la palat 18 snem ki don 37 ngut ki nongïashimbynta, ki khynnah shynrang kiba hapoh 18 snem ki don 111 ngut ki nongïashimbynta bad ki khynnah kynthei kiba hapoh 18 snem ki don 62 ngut.
Lah ban kdew ba ha kane ka jingïakop na ka liang ka CYD ka la phiah ha ki saw tylli ki kyrdan ha kaba: Ki nongjop ha ka kyrdan jong ki shynrang ba hajrong 18 snem kaba dei ka full marathon (42 km) ki long u Michealsing Ramsiej uba la mareh 2 kynta 35 minit bad rah ïa ka T. 35,000), u Jinesfulson Hoojon uba la mareh 2 kynta 38 minit (T. 20,000) bad u Wonderful Paliar uba la mareh 2 kynta 42 minit (T. 15,000).
Ki nongjop ha ka kyrdan jong ki kynthei ba hajrong 18 snem ki long ka Sangmir Teronpi kaba la mareh 49.54 minit (T. 15,000), ka Marqueenless Ramsiej kaba la mareh 52.13 minit (T. 10,000) bad ka Phidashisha Lyngdoh kaba la mareh 54.10 minit (T 5,000).
Ki nongjop ha ka kyrdan jong ki khynnah kynthei ba hapoh 18 snem ki long ka Abbagraceful Nongkseh kaba la mareh 54.23 minit (T. 15,000), ka Lyntijingkyrmen Kharjahrin kaba mareh 54.40 minit (T. 10,000) bad ka Serlibon Teronpi kaba la mareh 55.09 minit (Rs. 5,000).
Ki nongjop ha ka kyrdan jong ki khynnah shynrang ba hapoh 18 snem ki long u Aiborlang Wanniang uba la mareh 42.23 minit (T. 15,000), u Khrawkupar Puweiñ uba la mareh 43.12 minit (T. 10,000) bad u Bijoylang Lyngdoh Nonglait uba la mareh 43.26 minit (T. 5,000).
Ha kane ka sngi la sam ruh ïa ki khusam kiba dei ha ka kyrdan ba dang rit karta jong ki shynrang dei u Rifison Wanniang bad jong ki khynnah kynthei dei ka Saphibapynkmen Lyngdoh Mawnai bad ba la tymmen jong ki shynrang dei u bah Swonding Wahlang bad jong ki kynthei pat dei ka kong Kmoiñ Wahlang.
U kongsan ha kane ka sngi u long u bah Renikton Lyngdoh Tongkhar, MLA ka Mawkyrwat Constituency, ka kong Kmoiñ Wahlang kum ka Symbud Kongsan ha ryngkat ka jingdonlang u bah Bording Lyngdoh, u bah Weljune R. Nongsiej, u bah Jefferson Nongsiej, u bah Benningstar Lyngkhoi, ki ‘riew rangbah kiba long ki dkhot ka Centre for Youth Development (CYD) lem bad kiwei de.