Shilllong, Naitung, 12: Ka Federation of All Meghalaya Adhoc Secondary School Teachers Association (FAMASTA) ha ka Sngi Balang ka la aiti da ka dorkhas ha u Myntri ka tnat Pule Puthi ka Sorkar Jylla u Rakkam A. Sangma ban pan jingbit na ka Sorkar ban shah ïa ki nonghikai skul Adhoc Secondary ba kin ïakhun ïa ka elekshon MDC/MLA bad MP kumba la ai jingbit ïa ki nonghikai skul Higher Secondary.
Ka President jong ka Association ka Kong Bina Kharumnuid ha ka jingïakren bad ki lad pathai khubor hadien ka jingïakynduh ïa u Myntri ka tnat Pule Puthi, ka la ong, “ngi la pynsngew hakhmat jong u Myntri ban ym khang ïa ki nonghikai skul Secondary ban ïadon bynta ha ki kam seng saiñpyrthei bad ban shah ban ïakhun ïa ka elekshon MDC/MLA/MP kumba la ai jingbit ïa ki nonghikai skul Higher Secondary. Kum ki nonghikai ngi don ka jingïaryngkat kyrdan ban noh synñiang sha u sup u thiar jong ka saiñ hima sima jong ka Jylla bad ha ka ri na ka bynta ka jingkiew shaphrang ha baroh ki liang.”
“Ngi la pynsngew ruh ba ka Association nduh u snem 2006 ka la dawa ban ïa ka D.A na ka bynta ka bha ka miat jong ki nonghikai skul Adhoc Secondary. Hynrei ka Sorkar kam shym la pynurlong ïa ki jingdawa jong ngi hynrei ka la shu tyrwa ban pynkiew da ka jingsiew tulop ha ki khyndiat snem na ka T.1800 shi bnai iwei i nonghikai ha u snem 1995 sha ka T.29 hajar shi snem iwei i nonghikai katkum u Naitung, 2022,” la ong ka Kong Kharumniud.
“Ngi kyrpad sa shisien ïa ka Sorkar ban siew ïa ka Dearness Allowance (DA) nalor ka tulop sha ki nonghikai skul Adhoc Secondary khnang ba ki nonghikai kin dup lah ban pyndap ïa la ki jingdonkam ha la ing khamtam ha kum kane ka por ba ki marbam mardih ki la kiewdor shaba palat,” ka la bynrap.
