Ka rep ka riang ka dei u budlum jong ka jylla bad 80 na ka shispah ki nongshong shnong ha ka jylla Meghalaya kiba bun hi ki dei ki nongrep. Kine ki 80 persen ki bsa ïa ka ing ka sem, ki pynnang pynstad ïa ki khun ki kti da ka rep ka riang. Hynrei haba peit pat ïa ka jingim jong ki nongrep ka long kaba sangsot haduh katta katta namar ka jingbym don ka Polisi ba ka Sorkar kan thaw ka ban peit kyrpang tang ïa ka jingeh bad ka jingmyntoi jong ki nongrep ha ka jylla baroh kawei.
Ynda phai sha ka jinglong jingman jong ka rep ka riang katba nang tyllun ki shalyntem jong ka por, ka rep ka riang ka la nang tan bad hiar arsut. Watla ka Sorkar ka ju pynbna ïa ki song jingïarap kiba bun sha ki nongrep hynrei ki shu long tang ki bai shana bad ki bai mit mit khamtam haba ki nongrep ki mad ïa ka jingshah lynshop ki marep ha ki bor ka mariang.
Ha Meghalaya, haba kdew ïa ka rep ka riang, ka mut beit thik tang ka thung kba, ka rep soh, ka rep jhur, ka thung phan bad kiwei kiwei ki marrep ba ki paidbah nongshong shnong ki pyndonkam manla ka sngi ym kum sha kiwei pat ki jylla, kiba rep ïa u kynphad, rep pai, rep kew bad kiba kham pynjur ïa ka rep khaw.
Ka rep ka riang ha ka ri India hi baroh kawei ka noh synniang 51.9 percent sha ka ïoh ka kot jong ka ri ha u snem 1950. Hynrei hadien une u snem ka jingnoh synniang ka la hiar kynsan sha ka 13.9 percent. Ka daw ka long namar ka jingwan ki karkhana bad ka jingkharoi ki jaka sor ha kaba ki briew ki ïabeh sha ka juk thymmai katkum ka jingïaid jong ka juk. Ka jingkiew kynsan ki kharkhana ka pynlong ïa ki paidbah ban iehnoh shadien ïa ka rep ka riang bad phaikhmat pat sha kaba trei ha ki kam karkhana.
Ka Sorkar Pdeng kaba la phaikhmat sha ki nongrep ka la pyllait da ka skhim Pradhan Mantri Fasal Bima Yojana da kaba mang pisa 17,600 klur khnang ban ïoh theh jingïarap pisa sha ki nongrep kiba ngat ha ka soh sat na ka jingshah lynshop ki marrep ha ki bor mariang. Ka Cabinet Committee on Economic Affairs (CCEA) ka la mynjur ruh ban pyntreikam ïa ka Blue Revolution ha ri India na ka bynta ban pynkiew ïa ka jingpynmih ïa ki dohkha doh um kumjuh na ki pung, ki wah bad ki duriaw. Ym katta, ka Sorkar Pdeng ka la bhah pisa da ki spah klur ban pynjanai ïa ka jingpynmih ïa ka Dud ha ka ri. Ban pynjanai shuh shuh ïa ka jingïarap sha ki nongrep ka Sorkar ka la pynbna paidbah ban pyntreikam pat sa ïa ka Paramparagat Krishi Vikas Yojana na ka bynta ban ïada ïa ka jingkhoh ka khyndew ban ïarap ïa ki nongrep kiba thung jingthung khlem da pyndonkam da ki dawai sboh ba la khleh chemical.
Lada ïanujor ïa ki nongrep ka jylla Meghalaya bad ki nongrep ha ka jylla ka ïapher haduh katta katta, namar ka jingshah khnoit beiñ. Nalor kaba trei shitom bad kaba pynlut ïa ka por ka sngi hynrei ynda poi ha iew ki mar rep ki shu kylla mar pyut bad la hap ban shu die lilam katba lah ei tang ban lait ka bai kali namar ka jingshah khñoit dor ha ki mahajon.
Lada ka Sorkar Jylla ka kwah ban pynjanai ïa ka rep ka riang ha ka jylla Meghalaya baroh kawei, ka dei ban thaw noh da ka Policy kaba kyrpang kaba peit tang ïa ki nongrep khnang ba ki nongrep ki ïoh jingmyntoi na kane ka Policy.
Ki don ruh ki mar khlaw ba ki paid nongrep ki ju rep, kum u synsar ka Sorkar kam ithuh kum u mar rep. Hynrei ïa u synshar la ju shalan da ki phew bad ki spah trok na kane ka jylla sha kiwei pat ki jylla.
Kane ka Sorkar kaba mynta ka la nang ïai pynshlur ïa ki nongrep da pynlong ïa ki tamasa Sohtrun, Soh Phan, Soh Niamtra bad kiwei kiiwei ki mar rep khnang ba kane ka kyntiew ïa ki nongrep kiba ju shahniah ha kine ki jait mar kiba ju mih katkum ka jinglong jingman ki jaka jong ki District ka Jylla Meghalaya.
Dang ha kine ki khyndiat sngi, ki nongrep ka them Ri-Bhoi ki ud bad lynniar namar ka jingïap tram u sying uba ki la rep shitom haduh katta katta namar ka jingbam ki kynja khniang kiba ksam ha u sying. Kane ka dei kawei ka jingeh kaba ki nongrep ki mad namar ban rep ïa u sying ki hap ban shim da ka ram na ka Bank. Hato ka Sorkar kan map noh ïa ka ram ba ki nongrep ki la shim?
Namarkata, ka Agriculture Policy ka donkam kyrkieh ha ka jylla ban ïarap kham bha ïa ki nongrep kiba dang im ha ka rep ka riang bad ym tang katta, ka Sorkar ka dei ban pynshlur ruh ïa ki nongrep ba kin rep ïa ki mar rep ki bym ai dawai sboh ba khleh chemical khnang ban pynneh ïa ka rep tynrai u mynbarim kumba pynphriang da ka North East Slow Food and Agrobiodiversity Society (NESFAS) khnang ban pynneh pynsah ruh ïa ka mei-ramew
