Bthah ka Ïingkashari ban pyrkhing tyngeh ïa ka jingkit palat pud ki trok kit mar

Shillong,Jymmang 02: Ka Ïingkashari Meghalaya High Court hynne ka sngi nyngkong kala bthah ïa ka Sorkar Jylla ban pynjanai ïa ka Monitoring & Checking System (rukom tehlakam) ban pynthikna ba baroh ki kali kit mar ki dei ban bud thikna ïa ka kyndon ba pyrrkhing ïa ka jingkit khia palat ïa u pud.
Haba shong bishar ïa ka PIL bala mudui da u Tennydard M Marak ba ïadei bad ka jingkit palat pud ki trok dewiong, ka Ïingkashari bala khlieh da u Chief Justice Sanjib Banerjee kala ong “Dei ban pynjanai ïa ka Monitoring & Checking System khnang ba pynthikna ba baroh ki kali kit mar kin ym kit khia ïa ki mar palat ïa u pud bala buh, lada dei ban pynthikna ïa ka jingneh slem jong ki surok”.
Ka Ïingkashari kala bthah ruh ïa ka Sorkar Jylla ban file ïa ka affidavit ba kham bniah hashuwa ka sien shong bishar biang ka ban long ha ka 20 tarik u Jymmang.
“Ka Sorkar Jylla ka dei ban ai jingtip ïa ka sienjam ba ka thmu ban peitngor ban tehlakam ïa baroh ki kali kit mar haba ïadei bad ka jingkhia jong ka mar ba ki kit” kala ong.
Ka Ïingkashari ka ong ba haba ïadei bad ki trok kiba kit ïa u dewiong bala tih da ka lynti ka aiñ ne ba be-aiñ, ka donkam ban talasi ym ban shu ailad ba kin kit palat pud. “Ym don jingartatien ba ka Jylla kala shim ïa kine ki sienjam ban pynthikna ba u dewiong ba shu tih be-aiñ yn ym ïoh ban ïaid da kaba suk” kala bynrap.
Haba pynpaw ba bun ki surok Highway hapoh ka Jylla la ïoh ba ki kylluid ha ka por slap ban ha kiwei kiwei ki por, ka Ïingkashari ka ong, naba ïa ki mar ba pyndonkam ha kaba shna ïa ka surok khamtam ki Highway ki dei kiba lah ban shah rong ha ka um, ki trok ba kit palat pud ki pynkloi ïa ka jingrong noh ïa kine ki mar bad pynpra lut ïa u maw ba siang.
Ka Ïingkashari ka ong ba ka Sorkar Jylla ka pyntip ba ki don ki Weighbridge ha kylleng ki jaka bad ka dei ban ai ïa ka jingpynbna ba ki dei ban bud ryntih ha ka ba thew ïa ka jingkit mar ki kali ban pynthikna ba kim dei ban palat ïa u pud ba buh.
Ka Ïingkashari ba ka jingkhia jong u mar ba ka jingkhia jong ka kali ka dei ban long ha kata ka rukom ba ki surok Highway kin lah ban kyrda bad ba kin ym jot ne peitthliew khah khah lane ban jot kloi kumba long mynta.
Nalor kane, ka Ïingkashari ka ong ruh ba ym shym ka ïohi ban don ki weighbridge hapdeng ka Shillong bad Umiam lane hapdeng ka Umiam bad Khanapara, ki ban thew ïa ka jingkhia jong ki mar ba kit da ki trok bad dei ruh ban shim khia ïa ka jingshisha ba bun ki trok kiba ïaid mynta ki dei ki trok 16 shaka lane bun bad ki dei ruh kiba lah ban kit khia bha ïa ka mar palat ïa u pud bala buh da ka Sorkar Jylla.