Lada phi kwah jingkylla, pynjop noh da ka longkmie ha u 2023 – Bah Prestone

Shillong, Jymmang 02 : Bun ngut ki heh jong ka NPP kynthup naduh u National Vice President ka party ba dei ruh u Symbud Myntri Rangbah ka jylla, Bah Prestone Tynsong ki la hiar sha Shella constituency kaba dei ka kut ba skhem jong ka UDP, ban leit ïalap elekshon na bynta ka kyrtong jong ka party, Kong Grace Kharpuri.
Ha katei ka jingïalang kaba long ha Saitsohpen, la pynskhem ruh ïa ki nongkitkam kiba wan na man ki unit jong ka constituency ha ryngkat ka jingsakhi lang da ki spah spah ngut ki nongkyrshan.
La donlang ruh ha katei ka sngi u Bah Mosjo Wanswett uba la aireng lang ha ka elekshon shiteng samoi na Shella constituency bad ka Kong Grace hadien ka jingkhlad noh u Dr. Donkupar Roy. Mynta utei u rangbah u la pynbna ba un kyrshan borbah noh ia ka Kong Grace khnang ban poi sha ka thong.
Na ka liang u National Vice President, Bah Prestone Tynsong, haba kren ha kane ka jingïalang, u la ong ba dang shen la don kiba phone ia u ba ka don kata ka jingpynbeit ban ïatrei lang hapdeng ka UDP bad NPP ha Shella constituency ha ka elekshon ban wan.
“Dei na kane ka daw nga ruh nga wan hi mynta ka sngi shane ban pyntikna ba kam don kum kata ka jingtreilang bad ban pynbna ruh ba i Kong Grace in dei i kyrtong jong ka party ha u 2023,” ong u Bah Pretone.
Nalorkata, u kubur ba kadei ka jingshisha kumba ong i Kong Grace ba mynta sah sa tang 9 bnai na bynta ka elekshon MLA kaban long ha u 2023. “Sa 9 bnai pura thik ha u bnai Lber, 2023 i Kong Grace in shong ha Secretariat. Kitei ki 9 bnai ki dei ka por kaba donkam bha namar ban leh khlehbiej ym long ïoh tyllun sha riat. Hynrei lada trei bha bad janai, tang kata la tikna lypa ban jop.”
Shuh shuh u ong ruh ba ha Meghalaya ki don bun bha ki party riewlum tangba palat na Guwahati ym don shuh ba ithuh ym kum ka NPP kaba haduh Delhi ka don ïa ka jaka treikam kaba paka ha kaba ki paid ka thaiñ shatei lam-mihngi jong ka Ri kynthup na Meghalaya ki lah ban leit mih haba ki kynduh ïa kino kino ki jingeh.
“Katkum ka rekod, naduh u 1972 ym pat don ka Longkmie ba ïoh ban mihkhmat na Shella constituency. Kumta haba kren jingkylla donkam ban pynkylla noh ïa ki nongmihkhmat sha ka kynthei ha u 2023,” la bynrap shuh shuh u Bah Prestone.
Ka Kong Grace pat da kaba kyntu ïa ki nongkitkam naman ki unit bad ki shnong ba kin trei khlem shongthait ha kine ki 9 bnai ban wan, ka la ong ba kum ki nongkyrshan kin sa sngew jahthait ynda la ïoh ïa ka result bad ba ki jop.
Da kaba pynpaw ba ki la don bun bha ki jingkynthoh ba harukom ïa ka ha kylleng ka constituency katei ka longkmie kaba dei ruh ka MDC ba la jop haduh lai sien na Nongshken ka la ong, “Tangba ïa u dieng ba mih soh bun bha ki smat ban kawang hynrei ïa u bym don ei ei kim ju peit hi ruh.”
Ka Kong Grace ka la ong ruh ba ka thong jong ka lada ka jop kum ka MLA ha u 2023, ka kwah ban wanrah ïa ka jingkylla kaba kham pher na kaei kaba ka constituency ka la mad baroh shi katta na kti ki nongmihkhmat ba la bat da ka UDP.
“Da ka jingïatrei lang bad phi, ka NPP kan sa jop na Shella bad ruh ha ka jylla baroh kawei bad kan synshar hi marwei ha u 2023 khlem da donkam shuh ïa kiwei ki party ban ïatrei lang,” ka la ong.
Ha kane ka sngi la donlang ruh u MLA ka Nongstoin, Bah Macmillan Byrsat, MLA ka Mawryngkneng Bah Pynïaid Sing Syiem, MDC ka Mawphlang Bah Lamphrang Blah, MDC ka Mawsynram Bah Alvin Sawkmie, MDC ka Rambrai, Bah Bajop Pyngrope, MDC ka Mawlai, Bah Teibor Pathaw nalor kiwei ki nongïalam jong ka party bad ruh ki nongïalam ba hakhmat jong ka National People’s Youth Front.