Plie u Ma Sñiawbhalang Dhar ïa u maw nongrim ban tei ïa ka Myriaw RHC

Nongstoiñ, Jymmang 2: Ka long kaba sngew tynnad ba ka Gordon Robert Hospital ka jaka sumar kaba hap ha ka jingpeit jingkhmih jong ka Khasi Jaiñtia Presbyterian Assembly, ka la lah ban pynïar shuh shuh ïa ka jingshakri ïa ki para briew ha kylleng ki jaka wat haduh ki nongkyndong ruh.
Katei ka jingshakri jong katei ka Hospital ki long da kaba pynkha sa da kiwei pat ki jaka sumar kiba la tip kum ki Rural Health Centre, kiba la tei ha ki nongkyndong na kabynta ban ai ka jingshakri na ka bynta ki paitbah kiba duk ba suk. Haduh mynta ki la don saw tylli ki RHC kiba ka Robert Hospital ka la tei, kata ha Mawphlang, Laitmawsiang, Thangsning bad ha Myrïaw ïa kaba la plie ha ka 19 tarik u bnai Lber jong u snem ba la dep kum ka jaka trei kam ba shi por, kaba la pynlong ha ka ophis jong ka Myrïaw Presbytery kaba don hapdeng jong ka shnong Myriaw.
Dei tad haduh mynta ka sngi ka 2 tarik Jymmang 2022, ba la lah ban pynbit pynbiang ïa ki kot ki sla kiba ïadei bad ka jaka kaba la ai sngewbha da I kong Nightingale Diengdoh I ba dei I khun ksiew jong u (L) Syiem Soiñsingh Syiem u Syiem jong ka hima Myrïaw, na ka bynta ban tei ïa katei ka jaka sumar ha kaba la ïoh ban plie ruh ïa u maw nongrim da u Ma Sñiawbhalang Dhar Myntri ka tnad Urban Affairs Commerce & Industries jong ka sorkar jylla.
Ha katei ka sngi shuwa ban plie ïa katei ka centre, la pynlong ïa ka jingïalang ha madan jong ka shnong Myrïaw, ha kaba la pynïaid da u Pastor S.S Majaw u ba dei u Chairman jong ka Robert Hospital Governing Board ha ryngkat ka jingïadon lang jong u SPastor D.Rymbai Moderator KJP Assembly,Tymmenbasan F.J Mairom Organising Secretary Centenary Celebration Committee Pastor S.Dkhar Senior Administrartive secretary K.J.P.Assembly, u Dr W.R Kharlukhi M.P.Rajyasabha, u ba la shah khot kum u symbud kongsan , u bah A.Nongbri Additional Deputy Commissioner Esatrern West Kasi Hills, ki Pastor jong ka Myrïaw Presbytery, ki Rangbah shnong, ki Nonghikai, ki khynnah skul bad ki paitbah nongshong shnong na katei ka thaiñ. Ha kajuh ka por la ïoh ban pule na ka ktien jong u Blei bad duwai da u Tymmenbasan D.K.Kharshandi.
Ha kane ka sngi la ïoh ruh ïa ka jingkren pdiang bad ka jingpynshai lyngkot ïa ka rukom treikam jong ki RHC da u Dr R.Nongrum Medical Supritendent H.Gordon Robert Hospital. Nalor kata la ïoh ïa ka jingkren na u Dr.W.R.Kharlukhi ha kaba u la pynkynmaw ba ka mission ka jong u Trai Jisu haba u dang don ha ka pyrthei, ka long ban pynim bad ban pynkhiah.
Kumta ka jingshakri jong ka KJP Asdembly lyngba ka Dr H.Gordon Robert Hospital da kaba tei ïa ki Rural Health Centre, ka dei ka lad ban shakri ïa ki para briew ym tang ha ka jingkoit jingkhiah jong ka met hynrei ban long ruh ki nongpynkoit ïa ki jingpang ba kynja mynsiem. U Dr Kharlukhi kum u MP bad ruh u symbud kongsan, u la ong ba nalor ka laiphewphra lak tyngka kaba la dep mang na ka bynta ban tei ïa ka RHC, u la kular ban kyntiew biang sa khatsan lak tyngka bad ha u bnai Risaw ki nongpynïaid jong ka Committee ki dei ban pynbiang noh ïa baroh ki jingdonkam.
U Ma Sñiawbhalang Dhar haba kren kum u kongsan, u la ong ba un ym lah ban kular ei ei na ka bynta katei ka RHC, hynrei u la ong pat ba ïa ki jingdonkam baroh ki nongpynïaid jong ka Komiti kin sa wan mih ha ophis jong u, na ka bynta ki jingdonkam baroh na ka bynta ban pynbit pynbiang ïa katei ka RHC. La pynphuh pynphieng bad pynsngew tynnnad da ki jingrwai jong ki khynnah skul bad ki dkhot jong ka Standing Choir Myrïaw Presbytery.