Nongstoiñ, Jymmang 2: Ar ngut ki MDC barim kiba dei ki nongkyrshan barim jong ka PDF ha ryngkat u Vice President jong ka Nongstoiñ Block Congress Committee, ki la leit pynïasoh noh ïalade bad ka seng National Peoples’ Party (NPP) ha ka taiew ba la lah. Kitei ki ba dang pynïasoh thymmai ki kynthup ïa u Bah J.G.Rynñiaw, bah Nondi Diengngan, u Bah Starvid Kharbani bad u Bah Mario Nongkseh ha ryngkat ki nongbud jong ki.
Ïa kitei ki Nongïalam barim jong ka PDF bad Congress kiba dang pynïasoh thymmai, la pdiang da u MLA ka Nongstoiñ u Bah Macmillan Byrsat, u ba long ruh u President jong ka NPP Nongstoiñ Block, ha ryngkat ka jingsakhi bad ki spah ngut ki nongïalam ba shakhmat jong ka party.
Haba kren ha katei ka jingïalang, na ka liang jong u Bah Starvid Kharbani, Vice President barim jong ka Congress, u la ïathuh ba ka jingpynïasoh jong u bad ka NPP, ka dei na ka jinglah jong u Bah Macmillan ban treikam bad ban pynkylla ïa ka Nongstoiñ Constituency baroh kawei.
“Nga peit ïa u briew u ba lah ban treikam bad u ba lah ban pynkylla dur ïa ka Constituency bad nga ïohi tang ïa u ne u rangbah, u ba don shisha ka mynsiem ban trei na ka bynta ki kam pynroi ha ki liang baroh bad kumjuh ban ïalam ïa ki paitbah jong ka Nongstoiñ Constituency”, ong u Bah Starvid bad bynrap ruh, “Ym don u briew u ba kyrngah ïa ka roi ka par bad satang u ba matlah u bym ïohi ïa ki kam kiba u MLA ka Nongstoiñ u leh”.
U Bah J.G.Rynñiaw u la ong ba na ka liang jong u, u la la don lypa ka jingïap mat ïa kane ka party NPP, namar ka dei ka party kaba lah ban ïalam ïa ka jylla. U la ong ba ki nongïalam jong kane ka party ki dei shisha ki briew kiba la ih shisha bad kiba nud ban tare ïa ki kam kiba kiwei ki sorkar kim nud ban ktah. U la ïathuh ba tang mar ïa dep ban pynbeit ïa ki kam pud kam sam hapdeng ka Meghalaya bad Assam, u la pynpaw ba u sngewhun shisha ïa ka jingïalam jong ka NPP, khamtam kaba la jan pyndep wat ïa ka issue kharmetor kaba la neh da ki phew snem.
U Bah Macmillan Byrsat MLA ka Nongstoiñ, haba kren pdiang ïa kitei ki nongïalam jong kiwei pat ki party, u la ong ba ki paitbah jong ka Nongstoiñ ki dei kiba stad palat ban jied ïa u Nongmihkhmat, khamtam ha u snem 2018 namar ki jied ïa u briew na ka party kaba ïalam ïa ka sorkar ym ïa kiba shah ïalam ne ïa ki briew na kiwei ki party kiba don ha ka liang pyrshah.
U la ïathuh ba kiba bun ki project kiba kynthup ïa ka Nongstoiñ Urban Water Supply, kaba la sahkut namar ka jingbym don pisa ha kine ki snem ba la lah, mynta katei ka kam ka la jan dep. Ki surok PMGSY ki la wan poi sha man la ki dong jong ka Constituency, ka surok na Nongstoiñ-Wahkaji shaduh Ranikor ka la sdang ban trei, ka surok na Nongstoiñ-Kyrshai lyngba ka Rambrai, la dep ban aiti ban sdang pyntrei noh. Ki kam pynroi ha baroh ki liang ba kynthup ïa ka jingpyntrei ïa ki skul, ki college bad kiwei kiwei, ki jingïarap sha ki nongrep, ki lad jingïarap sha ki longïing ba duk bad sha ki shnong ki thaw bad kiwei kiwei.
U Bah Macmillan u la ong ruh ba ka jingwan rung jong ki nongïalam ba hakhmat jong ki party bapher bapher sha ka NPP, ka dei shisha ka kabu ban nang pynkhlaiñ ïa ka party khamtam ka jingwan rung jong ki briew kiba la ïaw bha ka rta bad ka jingmut jingpyrkhat kan pynkhlaiñ shibun ïa ka party ha Nongstoiñ. U la ïa wer ïa ki ban ai ka kti kamon ka kti kadiang, ban ïatreilang bad pynsngewthuh ïa kiwei pat ki bym pat shym la rung sha katei ka party.
