Hapdeng ka jingïaroh bad ka jingkop ka sorkar MDA hapoh ka jingïalam jong ka Seng NPP halor ka jinglah ban pynïapynbeit pud hapdeng ka Meghalaya bad ka Assam, pynban kane ka kam ka lah ban poi sha tyngkong ka ïingbishar ban ai ïa ka rai. Ka daw ka long ba ki kynhun Sengbhalang bad wat ka Khasi Hills Autonomous District Council (KHADC) ruh ki la rai ban leit ujor sha ka ïingbishar halor ka jingbymhun ïa ka Memorandum of Understanding (MoU) ba la ïaoi da u Myntri Rangbah ka Meghalaya, u Conrad Sangma bad u Myntri Rangbah ka Assam, u Himanta Biswa Sarma.
Ka daw ka jingbymhun ki Seng, ki Hima, ki Shnong, ki Paidbah na ki jaka khappud ba la ïapynbeit pud hapdeng ka Meghalaya bad Assam ka long namar ba kiba bun ki jaka ki puta jong ka Meghalaya ki la leit sha Assam. Ki paidbah jong ka Malangkhona ha West Khasi Hills District, ka Maikhuli ha Ribhoi District, ym tang ba ki pyrshah ïa kane ka jingkhynñiat ïa ki Shnong jong ki sha Assam, hynrei ki la ïam pangnud ruh namar ba mynta ki la hap noh ha Assam, katkum ka jingïapynbeit pud u Conrad bad u Himanta.
Kane ka jingkhih ki paidbah khappud, ki Hima, ki Raid, ki Shnong, ki paidbah, ki Sengbhalang, ka KHADC bad wat ki Political Party, ka long hadien ba ka MoU ka la paw pyrthei, kino ki jaka kiba leit sha Assamb bad kino kiba wan sha Meghalaya. Baroh shi katta ha ka jingleit jurip ki Regional Boundary Committee, ha ka jingïalang ba la khot da u Myntri Rangbah ïa ki Political Party bad wat ki trai shnong na kitei ki shnong ba pynhap sha Assam ruh kim shym la tip satia, hynrei dei tad haduh ban da ïadep soi ïa ka MoU lane ka jingïateh kular hakhmat u Myntri Korbar ri jong ka ri India, u Amit Shah ba ki paidbah ka jylla ki sa tip kino ki shnong na Meghalaya kiba poi sha Assam.
Balei kane ka jia, ka daw ka long ba u Myntri Rangbah u Conrad Sangma, haba u ïasoi ïa ka MoU ruh um shym la wanrah satia ha Assembly ban ïatai. Wat ha ka jingïalang ba u la khot ïa ki baroh ki Party ruh um shym la pynpaw shai kdar ïa ki jaka ban leit sha Assam. Kiba bun ki la sah ha ka umdum, namar la shu pynpaw tang ïa ki katto katne ki thaiñ bad ym shym la pynpaw than ïa ki Shnong.
Kumba la pynpaw da kiba bun, wat ka KHADC kaba dei peit ïa ka khyndew ka shyiap lane ki Hima kiba dei ki nongpeit ki nongi ïa ka khyndew ka shyiap ruh kim shym la tip bad ym shym la kynjoh ktien ban ïathuh shai ba kine kine ki jaka kin leit noh sha Assam. Kaei kaba la ïohi ka long tang ka jingkop jong u Myntri Rangbah, u Conrad Sangma bad katto katne kiba don ha ka Liang Synshar ba dei tang kane ka sorkar kaba lah ban pynbeit ïa u pud u sam hadien sanphew snem ba ka Meghalaya ka la ïoh la ka jong ka jylla.
Hynrei mynta ba la mih ka jingpyrshah na kiba bun ki liang,kiba kop ki la sdang ban randien noh, haba ki la sngewthuh kaei kaban jia na kane ka jingïapynbeit pud. Namar ba kadei artad ka snem ban leit sha ka elekshon jied MLA, ka jingïakynnoh ruh ka la sdang ban mih. U Myntri Rangbah, u Conrad Sangma, u la kynnoh ïa u Dr., Mukul Sangma, da kaba ong ba dei ka sorkar Congress ha u snem 2011 kaba la aiti sha ka Assam ïa ki kyrteng jong ki jaka ne ki shnong. Ki Seng Saiñpyrthei ba don ha ka sorkar ruh ki la sdang ban kynnoh ba kim shym la ïoh jingtip kaba bniah halor kane ka jingïapynbeit pud.
Imat ba ki la ïohi ba kane ka jingïapynbeit pud ka lah ban kyrtoh kylla, kiba bun ki la sdang ban kynran dien na ka jingïakop bad jingkhyllew ïa ka jinglah pynbeit pud, namar ba ki la sdang sngewthuh shano ka lyer elekshon kan beh na kane ka kam pynbeit pud.