Yn rah u CEM ïa ka jingaimut ki nongïalam shnong sha ka Committee pynbeit pud

Nongpoh, Naitung 03: Tang hadien kumba 2 taiew eiei bala thaw ïaka EC ba thymmai jong ka District Council, u CEM ka KHADC u Bah Pynïaid Sing Syiem lem bad ki dkhot ka Executive Committee mynta ka sngi kila hiar sha ka shnong Ummat haka thaiñ Block II kaba dei ka shnong kaba hap haka jaka kajia pud, ban leit peit bad jngoh ïa u Mawbah ki 12 kur, ka ba dei ka jaka lehñiam bad jaka tep ïaki mawshyieng jong ki briew kiba khlad noh na kane ka sla pyrthei ka ba dei tang naka bynta kitei ki 12 kur jong ka Raid Nongtung da ka jingangnud ban pynneh pynsah bad sumar ïa katei ka jaka bala buh naduh ki longshuwa manshuwa.
Tang mar ïa poi haka shnong Ummat kala don ruh ka jingïakynduh bad pdiang sngewbha mar kylliang da ki nongmihkhmat ka Khasi Hills Autonomous District Council bad na Karbi Anglong Autonomous Council ban ïa leit lang sha katei ka jaka da ka jingpynthikna ruh ban don ka jingïatreilang ban pynneh ïaka shongsuk shongsaiñ ki paidbah ha katei ka thaiñ, khamtam hapdeng ki jaitbynriew Khasi bad ki Karbi.
Nalor u Bah Pyniaid Sing Syiem CEM ka District Council, la synran lang ruh da ka kynhun EC ka KHADC naduh u Bah Pynshngaiñ N Syiem Dy. CEM, Bah Lamphrang Blah Chairman, Bah Charles Marngar Dy. Chairman, Rangkynsai Kharbuki EM, Bah Teibor Pathaw EM, katba naka Karbi Anglong Autonomous Council la wan ban mihkhmat da u Avijit Kro MAC Chinthong Constituency ryngkat bad ka kynhun haka jingdon lang ruh ki nongïalam Shnong naduh u Bah Blik Sohtun Chairman ka Synjuk ki Rangbah Shnong Border Area, Syiem Khynnah ka Raid Nongtung lem bad ki Rangbah Shnong.
Hadien katei ka jingleit jngoh ïa katei ka jaka lehñiam naka liang u CEM bad ka kynhun na District Council bad kumjuh ruh na Karbi Anglong Autonomous District Council kila shong da ka jingïalang ban ïa kren sani halor ka jingdonkam ban pynneh pynsah ïa katei ka jaka lehñiam khamtam kum ka Council ka ba peit kyrpang ïaka khyndew ka shyiap bad kular ruh ban ai ka jingïatreilang ha kano kano ka bynta ba donkam ha katei ka jaka.
Hadien katei ka jingleit jngoh ïa katei ka jaka lehñiam jong ka Raid Nongtung haka shnong Ummat naka liang ka kynhun jong u CEM kila leit ruh ban pynlong da ka jingïalang haka shnong Mawlasnai ban ïakynduh ïaki nongïalam shnong ban ïakren sani halor ka jinglong jingman bad ka jingeh jong ki paidbah ha katei ka thaiñ, khamtam hadien ba ka sorkar shen kan sa sdang biang ïaka wat ba ar ka jingpynbeit pud kaba kynthup ruh ïaka Block II.
Haba kren sha ki lad pathai khubor hadien ka jingïalang naka liang u Bah Pynïaid Sing Syiem u la ong ba ka jingthmu jong ka ka Council ban leit sha katei ka jaka ka long ban peit bad khmih ban tip ïaka jaka puta khamtam ban leit peit bad jngoh ïa kawei jaka lehñiam jong ki 12 kur ka Raid Nongtung bala buh naduh ki longshuwa manshuwa kum ka District Council ka dei kaba peit kyrpang ïaka khyndew ka shyiap bad ka riti ka dustur kaba dei ruh ka jaka ba dang sumar bad pynneh pynsah haduh mynta haka juh ka por u la ong ruh ba naka liang ka Council kan sa shong da ka jingïalang ban mang pisa naka bynta ban shna ïaki kynja jingtei ha katei ka jaka ban pynsahmam khnang ba katei ka jinglehñiam ha katei ka jaka kan ïai sah pateng la pateng.
U la ong ruh ba ka jingleit jong ka Council ha katei ka sngi ka long ruh ban ïakynduh ïaki paidbah ban ai mynsiem ïaki khamtam ban kyrpad ruh sha ki paidbah Karbi bad kumjuh ruh ki Khasi bad kiwei kiwei ki jaitbynriew ba kim dei ban pynmih kano kano ka huri hura lane ka jingsngewpher jaitbynriew hynrei ka shongsuk shongsaiñ ka dei kaba donkam eh hakhmat, bad u la pyntip ruh ka long kaba sngewkmen ba naka liang u CEM bad Dy.CEM kila long ruh ki dkhot jong ka Committee pynbeit pud jong ka sorkar bad kaei ka jingïakren kaba mih na katei ka sngi bad ka jingpynsngew da ki nongïalam shnong ha kaba ïadei bad u pud u sam, bad ka Council kan sa shong jingïalang bad ban rah ïaka jingai jingmut ki paidbah kiba la sei ruh ryngkat ki kot ki sla ban pynshisha ïaki jaka puta sha katei ka Committee pynbeit pud, u la bynrap.