Shillong, Naitung 03: Uwei u rangbah uba la don kumba 39 snem ka rta ïa uba la tip kyrteng kum u Bah Pynsuklang Khongwir u la duh ei ïa la ka jingim ha ka jingbthei bym pat lah satia ban tip kaba lajia ha ïingsah jong u ha ka shnong Lumkynsai, kaba don ha Smit, East Khasi Hills District.
Katkum ka jingiathuh jong u Rangbah Dong jong ka shnong Lumkynsai, u Bah Krostingwell Nongspung u la ong ba kane ka la jia ha ka por 11 baje mynstep ha ka 3 tarik u Naitung, 2023.
Haba ïakren bad kiba ha ïing ki la ïathuh ba kane ka nmar ym don mano mano ha ïing ha ka por ba jia kane ka jingbthei kim lah ban ïathuh kumo ka jia bad balei ka jia.
La ïathuh ruh ba kane ka jingbthei ka long kaba ja haduh katta katta ha kaba wat ka met jong une uba la khlad ka la pra lyngkhot lyngkhai lut. Lah ruh ban sakhi ba ki ïit kiba don ha kane ka mala ki la pait bad hap lut ha madan na ka daw ka jingjam palat kane ka jingbthei.
Ki bor Pulit marien ïoh jingtip halor kane ka jingjia, ki la leit marmar ryngkat bad ka kynhun Bomb Squad ban pynlong ïa ka jingtohkit kaba bniah khnang ban lap ïa ka daw tynrai.
Ki Pulit ka kynhun Bomb Squad bad ka CSU ki dang pynlong mynta ïa ka jingtohkit ban tip tynrai ïa ki tiar ba pynmih ïa ka jingbthei.
Ha ka kyrwoh sha ki lad pathai khubor u Superintendent of Police ka East Khasi Hills Bah Sylvester Nongtnger u pyntip ba ka jingbthei ka long kaba la jam bha haduh ba ka la pynjulor ïa katto katne ki kamra jong ka ma la ba nyngkong hapoh kane ka ïing.
U SP u ïathuh ba ha ka jingtohkit, ki bahaïing hasem ki la pyntip ba une u rangbah ba khlad u dei uba dang shu dep leh ïa ka spinal surgery ha kine ki arbnai ba la leit noh bad u la shu thiah beit ha jingthiah. Ki la pyntip ruh ba une u rangbah u la pyrshang ruh ban dkhat jubor ïa la ka jingim haduh arsien kynthih.
“Ha ka jingtohkit ïa ka jaka ba mih ka jingbthei, lap lap ïa ki lyngkhot lyngkhai kiba dei ki thymmei jong kane ka jingbthei. Ka kynhun Bomb Squad bad ka kynhun CSU ki dang tohkit ïa ki daw jong ka jingbthei” u la ong.
Ki Pulit ki la register case halor kane ka jingjia bad ka jingtohkit mynta ka dang ïaid shakhmat.
