Nongpoh, Jylliew 30: Ka Alpha English Higher Secondary School, Nongpoh mynta ka sngi ka la lah ban plie paidbah noh ïa ka Computer Science Laboratory ryngkat ka jingpynkup burom ïa ki 4 ngut ki khynnah skul kiba la wan rah burom ïa ka skul da ka jingpas bha ha ka SSLC bad HSSLC ba ki la rung ha ka thup jong ka top 10 bad top 20 kaba dei ka examination 2023 ba la pynlong da ka Meghalaya Board of School Education (MBOSE).
Ïa kane ka Computer Science Laboratory la wan ban plie paidbah da u MLA ka Nongpoh, u Bah Mayral Born Syiem kum u kongsan bad u la shim ruh ïa ka bynta ban pynkup burom ïa kitei ki saw ngut ki khynnah skul kiba la pas bha ha ka SSLC bad HSSLC examination 2023 na katei ka Alpha Skul.
Kiwei kiwei kiba la ïa don lang ha kane ka sngi ki kynthup naduh ka Kong P.L Nonglait, kaba dei ka District School Education Officer, u Bah Eric Calvin Dkhar, Block Development Officer ka Umling C&RD Block, ka Kong W.K Blah, kaba dei ka Principal katei ka skul ryngkat ki nonghikai bad ki khynnah skul jong katei ka skul.
Kum ban pynpaw, ïa kane ka Computer Science Laboratory la shna lyngba ki lad jingïarap na ka sorkar lyngba ka Chief Minister Special Development Fund 2021-2022, ha kaba haduh 25 tylli ki kor Computer la buh ha kane ka laboratory bad ryngkat ki jingpynbiang ïa ki WIFI internet ban pynbiang ïa ki jingdonkam jong ki khynnah katkum ka juk stad ba mynta.
Haba kren ha kane ka sngi, u MLA ka Nongpoh, u Bah Mayral Born Syiem u la ai ka jingïaroh ïa ka skul Alpha bad khamtam ka jingmih ki khynnah kiba proh jabieng ka la wan rah ïa ka nam bad ka burom jong kane ka skul bad ïa ka District hi hi baroh kawei.
U la ong ruh ba ka jingplie ïa kane ka Computer Science Laboratory ruh ka dei kawei na ka lad ban dang kyntiew ïa ki jingnang jingtip kiba dei shaphang ka juk stad ba mynta bad da ka jingdon kane ka Computre lab kan ïarap shibun ïa ki samla pule ba kin trei minor bad ban lum jingtip shaphang ka jingstad kaba dei katkum mynta khamtam ka kor computer ka dei kawei na bynta bahkhmat eh ba ki samla ki dei ban tip ha kum kane ka juk ïabeh jingnang jingstad.
Shuh shuh, u la ai khulei kyrpang ruh naduh ki bor pynïaid ka skul, ki nonghikai bad ki khynnah skul, ba dei lyngba ka jingïatrei lang ba kane ka skul ka la kiew shaphrang ha baroh ki liang bad u kyrmen skhem ruh ba nangne shakhmat kane ka skul kan dang ïai paw bad kan dang lah ban pynmih ki khynnah kiba stad bad kiba don ka jingkitkhlieh na ka bynta ka imlang ka sahlang, u la bynrap.
