Ban tehlakam ïa u drok, pynlong prokram ai jingpynshai ka tnat DSW – EJHD ha Pamra Paithlu PHC

Khliehriat, Jylliew 29 : Ka tnat District Social Welfare East Jaiñtia Hills District, hynnin ka sngi ka la pynlong biang ïa ka awareness prokram bad ai jingpynshai halor ka jingshyrkhei u drok, ïa kane ka prokram la pynlong ha PHC ha Pamra Paithlu bad kane ka prokram ka dei ruh ka Nasha Mukt Bharat Abhiyaan (NMBA) kaba dei ka prokram ba kyrpang ba la pyllait da ka sorkar pdeng ha kaba ïadei bad ka jingthmu ban tehlakam ia u drok.
Ha kane ka prokram la wan ban ïa don ryngkat lang ki nongtrei kiba ha khmat eh lane ki Front Line Workers ba kynthup ki nongtrei jong ka koit ka khiah, ki ASHAs bad ka Aganwadi ba lyngba jong ki ruh ki lah ban pyn saphriang ïa ka khubor sha ki nong shong shnong halor ka jingshyrkhei u drok, kumta ha kane ka sngi la ai jingpynshai kyrpang ïa kine ki nongtrei kiba ha khmat eh ba kin shim khia lang ban pynbna sha ki paidbah khnang ba u drok un nym ioh ban rung sha ki shnong ki thaw.
Ka District Social Welfare Officer East Jaiñtia Hills District, ka kong R.Passah, kumjuh ruh ka kong R. Patlong , kaba dei ka Programme Manager jong ka Mih- myntdu Community Social Welfare Association (MCSWA) bad kiwei kiwei, ki la ai ka jingpynshai shaphang u drok bad kumno ban iakhun pyrshah ban pynlong ïa ka imlang ka sahlang kaba lait na u drok, ki la kyntu ïa kitei ki nongtrei kiba hakhmat eh ba kin ai ïa ka jingiatreilang ban ïakhun pyrshah ïa u drok ba kin ïalap sha ki shnong ki thaw ban ai jingpynshai sha ki paidbah.