Nongstoiñ, Jylliew, 29: Ka jingpynsahteng jong u kontraktor u ba pynbha bad siang rong ïa ka surok na lad Nongjyllieh haduh shnong Lawse, kaba pynïasoh bad ka Dewlynnong Nongkhnum, Shad thum bad Weinia ka la pynjynjar ïa ki nongleit nongwan jong kiba bun tylli ki shnong ha katei ka thaiñ.
Kumta halor katei ka jingeh ba ki paitbah ki ïakynduh, ki nongïalam ka FKJGP Greater Nongkhnom circle mynta ka sngi ba kynthup ïa u bah Shanbor Rynshiang president, bah Ïoanis Ïawlar secretary ba la synran lang da u bah Chandra Nongdkhar President ka FKJGP West Khasi Hills bad Willis Syiem secretary bad kiwei kiwei ki nongïalam ki la leit ban ïakynduh ïa u bah James N.S. Lakiang Superin-tendent Engineer bad u bah F.Sohlang Executive Engineer ka tnad PWD Western circle ban ïakren halor katei ka mat.
Ha katei ka jingleit ïakynduh ïa kitei ki Ophisar ki nongïalam ka seng ki la aiti da ka jingthoh kaba la kdew ïa ki kyrteng jong ki Kontraktor kiba pyntrei ïa katei ka surok, ïa ka kyrteng jong ka skhim, ïa ka mang pisa bad ïa ka por ba la buh ba ki dei ban pyndep ïa ka jingtrei naduh ka sngi ba ki la sdang.
Nalor kata ha katei ka jingthoh ba ki la aiti sha kitei ki ophisar ka seng ka la kyrpad ruh ïa ki ba kin ïarap lem na ka bynta ban shna skhim na ka bynta ban pyntrei ïa ka surok ba thy6mmai na Weinia sha Niamlang, Disyiang sha Nongkhnum ka ban ïaid lyngba ka rudwah Kynshi lyngba ka Kynroh- Mawsyllorlangdang, Kroh-ïoh hin, Sdad-porsymbe, Risohkhe, Nong Um-thlong,Pordisyiang, Lawtisra haduh Nianlang.
U bah Shanbor Rynshiang haba ïakren bad u nongthoh khubor hadien ba ki la mih na ka ophis treikam jong kitei ki ophisarm, u la ong ba ka jingleit ïakynduh jong ki ïa kitei ki ophisar ka long kaba sei soh namar baroh ar ngut ki la kular ban shimkhia ha ka ban bthah ïa ki kontraktor kiba pyntrei ïa katei ka surok ba ki dei ban pyndep noh kloi katba lah khnang ba ka leit ka wan jong ki paitbah kan nym thut.
Nalor kata u la ong ruh ba ka jingkyrpad jong ka seng ïa kitei ki ohpisar ban shna skhim na ka bynta ban shna ïa ka surok ba thymmai ka dei, namar ba kiba wan shangkai suwari haba ki kwah ban leit na Weinia sha Shadthum ki hap ban wanphai sha Lawse bad lada don ka surok na Weinia sha Niamlang kaba don ha syndah bad ka Shadthum kan pynsuk shibun.
Nalor kata u la ong ruh ba lada ka don ka surok kaba ïaid lyngba kitei ki jaka ba la kdew kan lait ruh na ka jingpynjaboh ïa ka mariang na ka jingbret pathar ïa ki jaboh kum ki plastuk bad kiwei kiwei.
Na ka liang ki nongïalam ka seng ki la ai khublei ïa kitei ki ar ngut ki ophisar ba ki la kular ban shimkhia bad ban ïatrei lang bad ka seng na ka bynta ban kyntiew ïa ka roi ka par, ka bha ka miat jong ki paitbah ka thaiñ Nongkhnum.
Lada ka jingshimkhia jong ki kan urlong kan pynkiew ruh ïa ka jingwan jong ki nongshangkai suwari sha katei ka thaiñ, ban peit ban jngoh ïa ka jingitynnad jong ka mariang bad kan kyntiew ruh ïa ka ïoh ka kot bad kan long ruh ka lad ai kam ai jam ïa kiba bun ki samla jong ka thaiñ.
