Shillong, ïaïong, 30: Baroh ki paidbah ka jylla ki mutdur ba ki Nongmihkhmat ki dei ki nongthungkam bad ki nong aikam ïa ki khun ki bym ïohkam hynrei kam long satia ha kata ka rukom pyrkhat.
Na ka bynta ban weng ïa ki jingeh jong ki samla wadkam, u MLA jong ka Mawphlang Constituency u Bah Eugenson Lyngdoh Mawphlang u la wan shakhmat da kaba ïatreilang bad ki bor synshar District bad ka Mawphlang Community and Rural Development Block ban pynlong ïa ka jingïamir jingmut khnang ba ki samla kin dup ïoh jingtip ba ka Sorkar kam lah ban thungkam hynrei dei tang ka jingtrei shitom jong ki samla ba kin long ka lawei kaba phyrnai bad ka lawei jong ka jaidbynriew.
Haba kren ha ka jingïalang ba la pynlong ïa ka Mega Job mobilisation Camp ha skul jong ka Seng Khasi Tyrsad, Umkseh, u Bah Eugenson u la khot bad wer ïa baroh ki samla jong ka Mawphlang Constituency ba kin don ka jingkyrmen bad baroh ki samla kiba sah ha ka pyrthei ki donkam ka jingkyrmen namar ka long ka jingkordor jong ka jinglong samla sha ka lawei.
U la ïathuh ba ka imlang ka sahlang jong ki samla ka donkam ïa ka jingmut jingpyrkhat ban ïoh ïa ka kam ka jam khnang ba ka “Lawei” kan long kaba phyrnai.
“Ha ki por mynshuwa ki kmie ki kpa ki phah skul ïa ki khun ban ïoh ka jingnang jingstad bad shemphang hynrei mynta kam long shuh kumta namarba ka jingnang jingstad ka long kum ka atiar kaba khlaiñ na ka bynta ka lawei jong ka jaidbynriew,” ula ong.
“Lada ki samla jong ngi ki la don ka jingnang jingstad, ki dei ban long kiba shlur ban mih shakhmat ym dei ban lehraiñ ban ïathuh ïa ka jingeh,” u la ong.
Ïa kane ka jingïalang ïamir jingmut ban wand kam la pynïaid da u Bah F.B. Basan uba dei u BDO jong ka Mawphlang C&RD Block ha kaba la sakhi lang da ka Deputy Commissioner jong ka East Khasi Hills ka Kong Isawanda Laloo, ki ophisar Sorkar na baroh ki tnad Sorkar, ki kompeni aikam, ki Seng ïatreilang kiba kynthup ïa Rural Self Employment Training Institute, ka District Commercial Industry bad ka State Bank ka Ri India bad na ka Don Bosco Technical School.
