Jowai, Ïaïong 30: Ka Jaiñtia Student Union (JSU) kawei na ki seng treimon sngewbha kaba la rim bha hapoh ka Ri-Lum Jaiñtia kala kynjop mynta sha ka jingdap 50 snem ka jingshakri ïa ka ri bad ka jaitbynriew naduh ba la seng ïa ka ha ka snem 1972.
Mynta ka sngi 30 tarik u Ïaïong 2022 ka la sdang ïa ka jinglehkmen jong ka da kaba pynlong ïa ka jingïakynduh lang hapdeng ki dkhot barim bad ki dkhot ba thymmai ka seng bad ïa kane ka jinglehkmen yn pynkut ha ka 18 tarik jong u bnai Nohprah, 2022.
Ïa ka jingïalang mynta ka sngi la pynlong ha District Library Auditorium Mynthong Jowai, hapoh ka jingpynïaid u Ex President ka seng samla Rangbah Rikut Pareiñ, ha kaba la wan ban synranlang da ki nongïalang seng bhalang kiba kynthup ïa ka KSU, FKJGP, EJNC lem bad kiwei de.
Naka liang u kongsan jong kane ka sngi u ma Garland Rymbai uba dei ruh u Ex-President ha ka jingkren ula pynsngew ïa ki kam kiba ka seng kala leh naduh ki por mynshwa kiba hakhmat eh ka long ban dawa pynbeit ïa u pud u sam bad ka Inner Line Permit (ILP) kaba la buh thong ban pyndep kum ka seng naduh ki kitei ki por ba la seng ïaka.
Ula kyntu ïa ki nongïalam ka seng ba ki dei ban tur shaphang ïa ki jingïaleh namar ka don ka por ba hap ban shongthai bad ka don ka por ban mih shakhmat ha ka jingïakhun, da kaba ong ruh kum ki nongïalam ki dei ban don ïa ka jingtip bad ka jingsngewthuh ha kino kino ki kam.
U President ka seng samla Jersom Shylla ula pynsngew hapoh ka seng ym don riewspah ne u duk, ne ka jingsngewpher ñiam bad ki dkhot ka seng kim bit ban ïashim bynta ha ki kam sian hima sima’. Ka seng ka dang ïakhun na ka bynta ka jingbha jingmiat jong ka mariang, ka khuid ka suba bad ban ïada ka jingwan buhai jong ki briew ba nabar.
U General Secretary ka seng samla Treiborlang Suchen ula pynsngew shapang ka jingklet jong ka sorkar ïa ka Ri-Lum Jaiñtia ha kaba ïadei bad ka jaka bret ñiut wat haba ka jingheh ka Jaiñtia ka long 3819 squre kilo miter hynrei ym don satip kiba peit ïa kane ka jingeh naka bynta ban pynïoh ïa ka jaka kaba long katkum ka Solid Waste Management jong ka juk ba mynta.
Ula ong ba ki samla pule ka jylla kiba la don 30 hajar ngut kiba dang shu dep pass ïa ka matrik ki lah ban kynduh jingeh halor ka jingpynkheh jong ka sorkar kmie ban pynlong da ka Central University Entrance Exam, da kaba kyntu na ka sorkar ban kan pynsangeh shawa ïa kane ka jingthmu.
Ki riew rangbah kila la wan sha kane ka jingïalang ki kynthup ïa u MLA ma Nujorki Sungoh kum u symbud kongsan, u MDC ma Awhai Andrew Shullai, ma A. Papang Ex General Secretary, ma Starly Ryngkhlem, u D Khongsit, General Secretary FKJGP, u Shiningstar Kharbihkhiew Assistant Education Secretary KSU lem bad kiwei kiba la ai ka jingkitbok kitrwiang ïa ka seng JSU ba kan dang ïaid shakham ha ka jingshakri.
