Ki jingdih pynbuaid ki lah ban pyntroiñ ym tang ïa ka met hynrei wat ïa ka lawei Y.R. Mawlong

Mawkyrwat, Jylliew 26: Ka kong Y.R. Mawlong, MCS, Additional Deputy Commissioner, South West Khasi Hills District kaba long kum ka kongsan ha ka jingrakhe ïa ka sngi pyrshah ïa ki jingdih ba pynbuaid ne ka “International Day of Drug Abuse and Illicit Trafficking” hapoh ka Rangthong Community Hall, South West Khasi Hills District ka la pynkynmaw ba, “ki jingdih pynbuaid ki lah ban pyntroiñ ym tang ïa ka met hynrei wat ïa ka lawei jong ki”.
Ka jingthmu jong kane ka program ka long don ka jingïatreilang naduh ka imlang ka sahlang, ki paidbah jong ki shnong ki thaw, ki Balang, ka ri bad ka jaidbynriew ryngkat ka pyrthei baroh kawei ban lait na ka jingshahktah, shah-teh shah-khum ha u drok uba long u jingdih ba pynbuaid bad lyngba ka jingpynlong ïa ki prokram kan ai jinghikai bad pynsngewthuh kumno ban rad-dyngkhong ïa ki jaid jingdih kum u droks, ka kyiad, kiba la shim ïa ka jingim jong kiba bun kiba la ngat ha ka. Ban pynsngew thuh ruh ba lada ki briew ki la ngop ha kine ki jingdih ka wanrah ruh ka jingbym shongsuk shongsaiñ, ka jingbymshngaiñ shuh ha ka ïaid ka ïeng, bad kaba ktah ruh ïa ka jingkoit jingkhiah kaba long ka spah bah ha ka jingim briew.
Ïa kane ka jingrakhe la pynlong da ka ophis jong u District Social Welfare, South West Khasi Hills District bad ka ophis jong u District Child Protection Unit, South West Khasi Hills District ha ryngkat ka jingïatreilang bad ka Temperance Committee jong ka Jingïaseng Kynthei Rangthong District ka la pynlong ïa ka program jong ka jingrakhe ïa ka “International Day of Drug Abuse and Illicit Trafficking 2023” kaba dei halor ka phang, “People First: Stop Stigma and Discrimination, Strengthen Prevention”.
Haba bynrap ïa ka jingkren, ka kong Mawlong ka la ong ba la pynlong ïa kane ka prokram da ka jingthmu ban pynsngewthuh paidbah halor ka jingkyni ka jingdih drok bad ki jingsniew kiba mih na u drok kaba ha kajuh ka por ka long ruh ban pynpeit-mat, ban kyrsiew thiah khamtam ïa ki khun samla ban phai bad peit bha ïa ki jingeh kiba mih na ka jingkyrni jong ka jingdih drugs, ka jingkhaïi, ka jinñniew-beiñ peit-beiñ ne ieh-beiñ ïa kiba kyrni ha ka jingdih droks, kumno ban pynkhlaiñ ban ïaleh ïa jingeh kiba mih na ka jingdih droks bad ki lad jingïada ban lait na u droks.
Ka kong Mawlong ha ka jingkren jong ka ka la ban jur halor ka jingdonkam ban peit pyrman bad ban ïatreilang na ka bynta ban rat dyngkhong ïa une u jingdih ba sniew uba la ktah ym tang ïa ki ïing ki sem hynrei wat ïa ka imlang ka sahlang. Ka la ban ruh ba ka jingkyrni ha ki jingdih pynbuaid kum ka kyiad, kynja bad u droks ka la kylla long kum ka jingpang ka bym lah shuh ban sumar bad kaba la sar naphang kam kheiñ kynthei ne shynrang, la ha kano kano ka kyrdan ne na kano ka jaidbynriew kaba ktah ïa ka koit ka khiah ha ka met bad ki jingmut jingpyrkhat.
Haba ka pynkynmaw ïa ki jingsniew kiba mih na u droks ka la kyntu ïa ki khynnah samla ban kiar lai-maw lai-dieng na kiba kum kine ki jingdih pynbuaid kiba lah ban pyntroiñ ym tang ïa ka met hynrei wat ïa ka lawei jong ki. Namarkata, ka la khot la wer ban ïatreilang bad ban peitngor ban pynduh jaid ïa une u jingdih basniew da kaba kyrmen ba ka jingkhlaiñ ka dei ha ngi na ka bynta ban wanrah ïa ka jingkylla da kaba ngi ïaleh pyrshah bad ïakhun tyngeh ïa kane ka jingmlien kaba sinew ka bym don dawai ban pynkoit.
Kiwei de kiba la ai jingkren bad jinghikai ha kane ka sngi ki long u bah J.B. Tongwah, Officer In-charge jong ka Mawkyrwat Police Station uba la kren halor ka NPDS Acts, u bah G. Lyngdoh na ka ophis jong u District Child Protection Officer, South West Khasi Hills District uba la kren ïa ka “Jingktah jong u drok ha ki khynnah” (Impact of Drug among Children), ka Dr. D. Iawphniaw, Medical & Health Officer jong ka Rangthong PHC, South West Khasi Hills District kaba la kren ïa ka “Physical and Psychological impact of Drug”, bad u bah E. Tariang, In-charge jong ka ophis District Social Welfare Officer, South West Khasi Hills District.
Ha kane ka sngi la ïoh ruh ka jingpyni ïa ka drama na ka kynhun jong u Lovingstar Nongrem na ka Jingïaseng Samla jong ka Balang Presbyterian Rangthong.
Hadien ka prokram la ïoh ruh ban sam ïa ki khusnam sha ki nongjop kiba la ïashimbynta ha ka jingïaid-paidbah ne rally ba ki la thoh ruh ïa ki jingthoh pyrshah ïa u drok ha kaba Horirai Syiemlieh Memorial Higher Secondary School, Photjaud-Rangthong ka la wan ha ka kyrdan ba nyngkong, ka Rangthong Christian Higher Secondary School ka wan ha ka kyrdan kaba ar, ka Thiepdiengngan Kenïong Presbyterian Secondary School ka wan ha kaba lai bad ka khusnam kyrpang sha ka Tbeh-jingshai Village Organisation.
La pynïaid ïa ka jingïalang da ka kong D. Snaitang, Chairperson jong ka Temperance Committee jong ka Jingïaseng Kynthei Rangthong District, ka jingdwai sdang na u T.Bn. S.S. Thongni na ka Balang Presbyterian Rangjadong, ka jingkren mait-phang na ka kong Enterful Iawphniaw, Chairperson jong ka Jingïaseng Kynthei Rangthong District bad ka jingkren khublei na ka kong V. Syiemlieh, Finance Secretary jong ka Jingïaseng Kynthei Rangthong District.