Nongstoiñ, Jylliew 26: Ka Federation of Khasi Jaiñtia & Garo People (FKJGP) Mawlangsu Area unit ha ka jingïalam u bah Syrpaily Kharrit President bad u bah Oristarwel Lyngkhoi General Secretary FKJGP Mawlangsu Area unit, ryngkat ka jingsynranlang u bah Shanborlin Nongphud General Secretary FKJGP Rambrai Circle ryngkat ki dkhot jong ka seng, ha ka sngi saitjaiñ jong ka taiew ka la leit ban buh Memorandum hakhmat u Bah R.G Momin MLA 33 Rambrai-Jyrngam constituency.
Ka jingai memorandum ka dei ha ka jingwan iuh kjat ha Mawlangsu, ha ka ba ïadei ïa ka jingieh noh khunswet ka Sorkar Jylla ïa ka Surok Mawthung marwei, naduh Phudumbah Mawlangsu kaba 11 kilometer ka bym shym la trei pyndep ïa lai tylli ki jingkieng kaba la palat 25 snem ei ei.
Ka seng ka la dawa na utei u nongmihkhmat ba un shimkhia ban pyndep noh ïa kitei ki jingkieng ba la shu ieh khongreng bad ban siang rong noh ïa katei ka surok, khnang ba ki paitbah ka thaiñ kin suk ha ka leit ka wan.
Ka seng ka la buh ruh ïa ka jingdawa ban pynbiang ïa ki jingduna ha kaba ïa dei bad ka Sub centre Mawlangsu bad ban kyntiew kyrdan noh sha ka PHC, khnang ba ki paitbah ka thaiñ kin ïoh ïa ka jingmyntoi.
U bah R.G Momin MLA haba ïa kren bad ki nongïalam jong ka seng, u la kular hakhmat jong ki ban shimkhia mardor ban pynurlong ïa katei ka Surok bad ka Sub-Centre Mawlangsu.
