Lahduh u Daniel Wahlang & Balarisha Thyrniang ha ka 10K Olympic Day Run, da ki spah poi ki nongïashimbynta
Shillong, Jylliew 24: Ka jingïakop mareh 10k Olympic Day Run ba la pynlong da ka Meghalaya State Olympics Association (MSOA) hynnin ka step ka 24 tarik la ïoh ban khylliap noh ha kaba ki nongjop la khur da u Daniel Wahlang na ki shynrang ryngkat bad ka Balarisha Thyrniang kaba la jop napdeng ki kynthei.
ïa kane ka lympung kaba la plie lad lang na bynta ki shynrang, ki kynthei bad kiba la heh rta, kiba la kynjoh palat 18 snem ka rta shaneng, la ïoh ban sdang naduh ka por 6:00 baje mynstep na Polo Ground Shillong. Kane ka jingïakop mareh ka long shi bynta ka jingrakhei ïa ka International Olympic Day, kaba la ju rakhe barabor ha ka 23 tarik u Jylliew ban sah kynmaw ïa ka International Olympic Committee kaba la seng ha u snem 1894. Kine ki tamasa ïakop mareh ba10km la ju pynlong ha kylleng satlak ka pyrthei, kaba ju pynmareh ha ka Sngi Saitjaiñ kaba jan ïa ka 23 tarik.
Kane ka tamasa ïakop mareh jong ka Shillong 10K Run, ka la khring ïa palat spah ngut ki nongïashimbynta, naduh kiba dang khynnah shaduh kiba la rangbah ka rta, kiba la kyntiew kyrteng lyngba ka Meghalaya State Olympic Association website, ryngkat bad kiwei kiba la wan ban ïashimbynta ha ka por mynstep.
La ïoh ban kaweh ïa lama ban sdang ïa ka jingmareh da u Myntri ba donburom jong ka tnat Sports and Youth Affairs, u Bah Shakliar Warjri (u ba dei ruh u officio President barim jong ka MSOA) ha ka jingdon ryngkatlang bad ka Director of Sports and Youth Affairs, i Kong Isawanda Laloo, u General Secretary jong ka MSOA, i Bah Finely L Pariat bad ruh kiwei ki dkhot ba la rangbah jong ka MSOA bad ka DSYA.
Haba ai jingkren shuwa ban kaweh ïa lama sdang, u Bah Shakliar Warjri Myntri jong ka tnat Sports and Youth Affairs u la ong ba u la ïoh jingtip ba ki don kumba 80 % ki khynnah samla ki bym shym la ïoh ban bha ka por ban pynkhreh ïa kane bad u la ai jingmut ruh ïa baroh kiba la wan ban ïashimbynta ha kane ka jingïakop mareh ba ki dei ban bteng ban sumar khnang ban ïoh ïa ka met kaba shait kaba khlaiñ.
La ïoh ban sdang pynmareh na Polo Ground complex shuwa ban ïaid lyngba ïa ka 4th Furlong, B.K. Bajoria Junction, B.K. Bajoria, PGT College, Shillong Commerce College, Shillong College, Don Bosco Square, Laitumkhrah Police Point, Laitumkhrah Police Beat House, Fire Brigade, St Edmund’s School, Dhankheti, Malki Point, Barik Point, Civil Hospital, State Central Library, Meghalaya Secretariat, DC Office, Governor House, Wards Lake, CM Bungalow, Polo Tower, bad iew Polo ha sha ba yn pynkut pat ha JN Stadium Gate No. 1.
U Daniel Wahlang u la ïoh ban jam nyngkong sha ka thong kaba kut, bud nadien sa u Wolbetstar Ramsiej bad u Sainkupar Jyrwa kiba la wan ha ka kyrdan ba ar bad ba lai napdeng ki Shynrang. Hadien nangta bud sa ka Balarisha Thyrniang kaba la wan ba nyngkong napdeng ki kynthei, bud sa ka Bandasharai Marwein ha ka kyrdan ba ar bad ka Marqueenless Ramsiej ha ka kyrdan ba lai.
Baroh ki nongjop na ka thup ki Shynrang bad Kynthei ki la ïohpdiang ïa ka song pisa mar 7,000, bad Rs 5,000 na ka bynta kito kiba wan ha ka kyrdan ba ar, nangta 3,000 na ka bynta kito ba wan ha ka kyrdan ba lai. Shuh shuh na ka liang jong ki bor pynïaid jong kane ka jingïakop mareh ba 10K ka la ai ruh ïa ka buskit Consolation prize da ka song mar 1,000 sha kito kiba la wan ha ka kyrdan ba saw haduh ba wan ba phra napdeng ki kynthei bad shynrang.
La ïoh ruh ban sam khusnam sha kiba la rangbah kiba la wan ban ïashimbynta ha kane ka jingïakop mareh -kata sha kito kiba la palat ïa ka 50 snem ka rta – bad ïa kane la ïoh ban sam sha i Bah Badon Singh Tham u ba la wan ba nyngkong nadpeng ki shynrang. U ne u rangbah ba la don 51-snem ka rta u la wan ba ar ha u snem 2022 hynrei mynta u la lah ban leh khambha shuh shuh ban wan sha ka kyrdan ba nyngkong. I Bah Pynshngainlang Dkhar i la wan ha ka kyrdan ba ar bud sa da i Bah Kedrick Kharpor ha ka kyrdan ba lai.
Napdeng ki kynthei ba la kham heh ka rta, i Kong Bitiris Marbaniang i la wan ha ka kyrdan ba nyngkong, bud sa i Kong Starina Jasain bad i Kong Snora Rani kiba la lah ban wan pyndep ïa ka jingmareh hapoh shuwa ban dap shi kynta. La ïoh ban aiti ïa ka song tyngka sha ki nongjop ha rynsan da i Kong Smti Laloo (Director of Sports and Youth Affairs) bad da u Myntri ka Sport, i Bah Warjri, kiba la ïashimbynta shiteng ban mareh ryngkat bad ki nongkitkam ka MSOA.