Khliehriat, Jylliew 23: Ki pulit jong ka Umkiang Patrolling Post, East Jaiñtia Hills District, mynta ka sngi ki la pynlong ïa ka prokram ba kyrpang na ka bynta ban ïalap paidbah ïa ka jingshyrkhei u drok, halor kane ki pulit ki la sam ïa ki kot lyngkdop sha baroh ki nongñiah trok kiba ïaid lyngba na katei ka surok NH-6 Umkiang.
Ïa kane ka prokram la lam khmat da u Sub Inspector jong ka Umkiang, u bah B.Marbiang, Head Consatble, u R.Rawat, u LC,u bah R. Laloo, ki pulit ki la pynshai ruh sha baroh ki nongñiah trok halor ka jingshyrkhei u drok uba ktah ym tang ïa ki longiïng longsem hynrei u ktah ruh ïa ka imlang ka sahlang baroh kawei.
Ha ki kot lyngkdop ba la sam ki la don bun ki jingthoh kiba thoh shaphang u drok kiba ong “Ngan nym ailad ïa u drok ban bust ha ki jingphoh sniew jong nga- Ong Em ïa u Drok- U drok un pyniap ïa phi suki suki- Wat shim ïa u drok ban long mraw ha ka bih jong u drok- Katba phi dang shim ïa u drok, khyndiat sngi phi im, u drok u pynkut lut ïa baroh ki jingangnud ba bha- Pim donkam Herion ban long u Hero- Wat shah ba u drok un pynjot ïa ka pyrthei jong phi”
Ïa kaba kum kane ka awareness prokram ka tnat pulit jong ka Umkiang PP, kan pynlong biang lashai ka sngi kum shibynta ban iakhun pyrshah ïa u drok bad ïa ka jingwan rung u drok shapoh ka jylla lyngba ka East Jaiñtia Hills District.
Kum ban shu kynthoh, wat hapdeng ka jingduna ki pulit hapoh ka district, kata haba ïa nujor bad kiwei kiwei ki district, hynrei ka tnat pulit jong ka East Jaiñtia Hills District ka la ïaleh shitom ha kaba shim khia bad bteng ïa ka jing iai long peit ngor ha baroh ki por ban tehlakam ïa ka jingwan rung u drok shapoh kane ka jylla Meghalaya bad la bun tylli ki ejahar la dep ban register ha ki Police Station ha East Jaiñtia Hills District ha kaba ïadei bad u drok bad la bun ngut ki briew kiba donkti ha ka kam khaiï drok la kem bad pyn ngat hapoh ki kyndon aiñ jong ka NDPS Act.
