Mawkyrwat, Jylliew, 23: Ki 14 ngut ki khynnah kiba dei na ka shnong Mawpat, South West Khasi Hills District ki la poi sha jaka sumar tang na ka daw ba ki kum bakla ban bam ïa u tit-dait-saw bad ki la bam ruh tang para khynnah ha kaba kane ka jingjia ka la jia ha ka 20 tarik u Jylliew, 2023.
Ka kong Elenda Sangriang kaba dei ka kmie jong ki khynnah rit na ka shnong Mawpat haba kren ha ki lad pathai khubor ka la ïathuh ba kane ka jingjia ka la jia naduh ka 20 tarik u Jylliew, 2023 ha kaba ki khun jong ki la kheit ïa u tit na khlaw bad ka jingleit ruh ki la leit tang para khynnah hi bad ynda ki la poi sha ïing ki la ïa shet hi khlem da don ki kmie ki kpa ha ïing.
“Hadien ba ngi ki kmie ki kpa ngi la poi ïing la ïohi ba ki khun ki la prie bad pynhiar ynda la kylli, la ïathuh ba ki ki bam ïa kita ki tit ba ki kheit na khlaw”, la ïathuh ka kmie.
Namarkata, ka la la ïathuh ba mar mar hangta hi khlem da pynslem la leit rah noh sha ka jaka sumar ha PHC Wahkaji hynrei bad nangta la phah kit noh hapoh ka Civil Hospital ba 100 jingthiah ha Mawkyrwat ban ïoh ïa ka jingsumar kaba kham biang.
Katba ha ka jingïoh ban ïakren bad u Dr. R.M. Lathong, Medical Health Officer (MHO) hapoh Civil Hospital, Mawkyrwat hadien ba u la lap ïa kane ka jingshisha u kyntu ïa ki paidbah bad ki longkmie longkpa bad ruh ïa ki khynnah ba kim dei ban bam kulmar ïa ki kynja jhur khlaw kum ki tit namar ki don ki tit kiba don ïa ka bih kaba wanrah ka jingmynsaw ïa ki briew.
U Dr. R.M. Lathong ula ong shuh shuh ba 11 ngut ki la ïoh ka jingkoit bad satang 3 ngut kiba dang shah sumar bad kyrmen skhem ba kine baroh kin sa koit sa khiah noh shen.
