Shillong, Jylliew 22 : Ki bor Pynïaid District jong ka East Khasi Hills ha ka sngi Palei ki la phah kynrïah noh ïa baroh ki briew kiba sah ha ka Iing jong u Dr ML Deb ha kaba don hajan ka Hotel Heiga, Lachumiere namar ka jingshong synjor na ka jingtwa.
Na ka daw kane ka jingtwa khyndew la ïohi ba ki maw bad khyndew ki la hap lut sha ka surok bah hapdeng ka Malki bad Dhankheti bad marmar ki kali puh shilum ki la bunkam baroh shi miet bad weng ïa ka khyndew bad ïa ki maw khnang ba ki kali kin ïoh ïaid biang na kane ka surokbah.
Ki bor pynïaid District namar ka jingsakhi ba ka iing jong u Dr ML Deb kala shong synjor bad ka don jingma, ba ka khyndew ka lah ban twa biang na ka jingslap kumta ki la bthah ïa ki arngut kiba shong basah ha kane ka iing ba kin mih noh ha ka miet jong ka sngi Balang ban lait na kano kano ka jingma bad jingmynsaw.
Ïa kane ka bynta kaba twa ka khyndew la sop noh da ka tarpaulin khnang ba kan ïada na u u slap.
