Shillong, Jylliew 22 : Ka seng ki nongkhaii bad nongdie syiar hapoh ka shatri ka All Meghalaya Poultry Supplier and Retailer Association ha ka sngi Palei ka la kyntait ba ka don ka jingpang ha ki syiar kumba la kynnoh ha ki rynsan Social Media.
Haba kren sha ki lad pathai khubor u President ka AMPSRA u Bah Wanshai Kharchandy u la ong ba kanre ka jingkynnoh ka dei ka khubor lamler kabym don jingshisha haei haei ruh.
“Hadien ba ngi ïohi ïa ka jingsphriang kato ka khubor ngi la leit mardor ban ïakynduh ïa ki Doctor jong ka tnad Animal Husbandary and Veterinary ban wad jingshisha ïa kane bad na ka liang jong ki ki la pynthikna ba kam shym la don satia kano kano ka jingpang ki syiar ha ka jylla”, ong u Bah Wanshai.
U la ong ba ki briew ki la shu shna thok ïa ki dur ki dar bad pynsaphriang ïa ki khubor ba ki syiar ki la ïohpang bad kane ka la pyntieng bad pynsyier ïa ki paidbah ban bam ïa ka doh syiar.
U la ïathuh ba ka seng ka la leit ïakynduh ruh ïa ki pulit ka Lumdiengjri Police Station ban shim khia lem halor ka jingpynsaphriang khubor thok ban pyntieng ne pynsyier ïa ki paidbah.
Ula ong ba ka seng ka sngew ruh ba dei ban pynshitom ïa ki briew kiba donkti ha kaban pynsaphriang ïa ki khubor lamler ki bym don satia ïa kano kano ka jingshisha.
