Shillong, Jylliew 22: Kum shi bynta ban snohkti bd ki nongshong shnong ka jylla Manipur ha kaban dawa ban wanrah jingsuk biang sha kane ka jylla ba jia ka jingïaumsnam kaba shyrkhei na ka daw ka jingïakynad jaidbynriew hapdeng ki Kuki bad Meitei, ka North East Students Organisation (NESO) ha ka sngi Palei ka la pynbna ban pynlong da ka jingïathang mombiti ha manla ki Nongbah jong ki Jylla ka thaiñ, ka ban long la 28 tarik Jylliew, na ka bynta ban kyrpad ha kaban wanrah noh ïa ka jingsuk ha Manipur haba kyntu ruh ïa u Myntri Rangbah Duh ban kein noh ïa ka jingsngap jar jar halor kane ka jingjia.
“Ka NESO ka dap da ka jingkyndit bad jing sngew lyngngoh ïa ka jingsngap jar jar jong u Myntri Rangbahduh ka ri halor ka jingjia ha Manipur. Kane ka jingsngap jar ka jongu kan nang pynjngai shuh shuh ïa ki riewlum jong ka thaiñ shatei lam mihngi. Ka NESO ka kyntu ïa u Myntri Rangbahduh ka ri ba yn kren eiei, lem kumta ka sorkar pdeng ka don ïa ka jingthmu sha lyndet halor kane ka jingbym kren eiei” ong ki nongïalam ka NESO.
Ha ka kyrwoh sha ki lad pathai khubor, ka NESO ka la pyntip ba kan pynlong ïa kane ka jingthang mombiti khnang ban kyrpad ïa baroh ba kin sangeh noh ïa ka jingïaumsnam khnang ba ka jingshongsuk shongsaiñ kan wan phai ha Manipur.
Ka NESO pynpaw ïa ka jingsngewsih halor ka jingïai bteng ka jingïaumsnam hapoh ka jylla Manipur ha kaba ki iing ki sem ki la shah pynjulor bad kumjuh ruh ka jingduh da ruh ei ki mynsiem briew la palat ïa ka 100 ngut.
Katkum ka kyrwoh khubor na u Chairman ka NESO u Bah Samuel B Jyrwa bad u General Secretary u M Thobu ki la pynpaw ïa ka jingsngewlem ïa ka jingmad jingjynjar ki paidbah ka jylla Manipur bad kila wer ban pynneh noh ïa ka shongsuk shongsaiñ bad ban pynsangeh noh ïa ki kam ïaumsnam ne jingpynjulor ïa ki jingdon jingem.
“Ka NESO ka kyntu ïa baroh ki nongshong shnong jongka Manipur ba kim dei ban ngeit bad ban pynsaphriang ïa ki khubor thok ne ïa kino kino ki jingpyntip kiba nang pynsniew shuh shuh ïa ka jinglomng jingman kaba don mynta” ong ki nongïalam ka NESO.
Ka NESO ka kynnoh ïa ka sorkar jylla bad ïa ka sorkar pdeng halor ka jingbym ler ka jongki ban tehlakam bad ban pynsangeh ïa ki kam ïaumsnam wat la ka la don palat ïa ka 45 sngi bad wat la u Myntri Kam Pohiing ka ri u Amit Shah u la leit iuhkjat ha katei ka jylla bad ki la don ruh ki shipai palat ïa 40,000 ngut.
