Shillong, Jylliew 22 : Ka kynhun jong ki jaidbynriew riewlum ritpaid ha ka jylla hapoh ka shatri ka Meghalaya Indigenous Minority Tribes’ Forum (MIMTF) ka la dawa ïa ka Sorkar Jylla ba kan ai 15% ka bhah sha ki na ka Job Reservation Policy jong ka jylla.
Kine ki jaidbynriew riewlum kiba dawa ïa kane ka bhah ki kynthup ka jaidbynriew Rabha, Boro, Koch, Hajong bad ki Man ka Ri-lum Garo na ka State Reservation Policy ka Jylla.
Ha ka dorkhas ba la aiti sha u Myntri Rangbah ka Jylla Conrad K Sangma, ka Forum ka la ong “Ngi da kyrpad rit ïa phi ban sngewbha mynjur lem ban ai ïa ka bhah ba 15%, ynda la bishar bad pynkylla thymmai ïa ka Reservation Policy ka Jylla, sha ki riewlum ritpaid ka Meghalaya khamtam ki Hajong, Koch, Rabha, Boro-Kacharies bad ki Man, kum ka jingailad ba kin kiew bad ïa kot kyrdan bad ki Khasi, Jaiñtia bad Garo”.
Kane ka dorkhas ka dei kaba la soi da ka Meghalaya Hajong Welfare Association, Meghalaya Rabha Jatio Sewa Sangha (MRJSS), Meghalaya Koch Association, Meghalaya Boro Sahitya Sabha bad ka All Mann Tai Speaking Welfare Association.
“Lada mynjur, ngi sngew, kane kan khyllie noh ïa baroh ki jingduhnong kaba ngi la mad ha kine ki 51 snem haba phai sha ka jingïohkam Sorkar bad ruh ha kiwei kiwei ki bynta kum ha ka pule ka dangle, ka ïoh ka kot bad kiwei kiwei” ka la ong.
Haba pynpaw ba ki dei ki Nongshongshnong ba pura ka Jylla Meghalaya, ka Forum ka la ong ba kum ki Khasi, Jaiñtia bad ki Garo, ki ruh ki dei ki “paid riewlum trai ri” haba bynrap ba ki Karb/Marngar (Dimasa) ba sah ha Ri-Bhoi District ruh ki dei ki paid riewlum trai ri jong ka Jylla.
“Ha kane ka Job Reservation Policy ba mynta, kaba long 40 % ïa ki Khasi bad Jaiñtia, 40% ïa ki Garo, 15 ïa ki General bad 5% ïa ki Other schedule Tribes bad Schedule Caste, wat la ka bhah jong ngi ka long 5% hynrei ka jingshisha pat ka long tang 2% lada ym duna namar ngi hap ban ïasam lang bad ki Scheduled Caste bad kiwei kiwei ki riewlum na shabar ka Jylla kum ki Naga, Mizo bad kiwei kiwei” ka la ong.
