Nongstoiñ, Jylliew, 22: Ka West Khasi Students Union (WKSU) hynnin ka miet sngi Balang, ka la leit ban pynsangeh kyndit noh ïa ka jingleh screening jong ka Ophis ka DSO ïa ki khynnah skul ki ban ïalehkai ha ka Subroto Cup.
Kane ka jingleit pynsangeh ka dei tang halor ka nongrim ba ïa kane ka jingleh screening la pynlong wat haduh ka por mynmiet ba la palat ïa ka 9 baje.
Ka WKSU hapoh ka jingïalam u Secretary Banshanlang Syiemlieh, ka la leit ban pynsangeh ïa kane ka jingleh screening ha ka por 9:30 baje mynmiet bad pynpaw ba ka seng kam sngew ïahap shuh ba ka Ophis ka DSO kan bat sah ïa ki Khynnah kat haduh kane ka por mynmiet.
Ka WKSU ka la kyntu ïa ki skul bad ki khynnah kiba wan screening bad ki bym pat sngewhun ïa ka jingleh screening hynnin ka sngi, ba kin ïawan biang ha ka 23 tarik ha ophis ka Tnad Sports ha ka jingïadonlang ka WKSU ban ïoh peit bha ryntih ïa ka rukom leh screening.
Kane ka seng ka la kyntu ruh ïa ka DSO ba kum kine ki jingjia kim dei ban nang jia biang hapoh ka District, ha kaba ka la maham ruh ba lada jia eiei ïa ki Khynnah skul kiba wan screening haduh ka por 9:30 baje mynmiet, ka DSO ka dei ban shim ïa ka jingbynta jong ka jingkitkhlieh.
