Yn shong bishar ka Sorkar ïa ka jingai jingmut ki Seng Saiñ Pyrthei halor Reservation Policy

Shillong, Jylliew 20 : Ka sorkar kan sa shong bishar halor ki jingai jingmut bad jingkylli ba la buh da ki Seng Saiñ Pyrthei bapher bapher ha kaba ïadei bad Reservation Policy ka ban sa bishar bniah bha bin pa bin da ka Expert Committee.
Haba kren sha ki lad pathai khubor ka Chairperson jongka Committee jong baroh ki Seng Saiñ Pyrthei I Dr M Ampareen Lyngdoh I la ong “ Ngi la ai por ïa ki Seng Saiñ Pyrthei ban pynpoi lut baroh ki jingai jingmut bad jingkylli jongki kat haduh mynta ka sngi la ka long sha i kum ka Chairperson, sha u Myntri Rangbah ka jylla u Conrad K Sangma ne sha u Chief Secretary ka jylla bah D.P Wahlang khnang ba ka sorkar kan ïoh suh lang ïa ki bad ban shong bishar kawei hadien kawei pat. Ngin sa bishar bad pule bniah kiei ki jingkylli, ki jingpan jignpynshai, ki jingai jingmut ba ki seng saiñ pyrthei, ki seng bhalang, ki MLA bad ter ter namar shwa ba ka Expert Committee kan shong ngi dei ban tip hi kiei ki jingkwah jong ki shwa ban bishar bniah halor ka jingdawa ban wanrah ka jingpynkylla ha ka policy”.
Da kaba ong ba kane ka kam kan kham shimpor “ Hynrei ngi kyrmen ba ka Committee kan sa lah ban bishar bniah bad pynshai ruh ïa ki jingkwah jong ki seng saiñ pyrthei, seng bhalang, ki MLA ad kiwei kiwei ban lait na kino kino ki jingshah ktah ha ki kyndon aiñ. Nga ngeit ba kaei kaba ngin leh kan long da kaba bishar bniah bad ïa kiei kiei ki ban rai ruh yn pyntip sha ki paidbah lyngba ki lad pathai khubor” ong I Dr Ampareen.
I la ïathuh ruh ba ka Kynhun Myntri ka shu shim rai ban pynmih ïa ka Office Memorandum (OM) ba thymmai halor ka jingpyntreikam ïa ka roster system khnang ba ka jingthung kam kan ïaid beit shakhmat kaba long ka jingmyntoi jong kiba bun ba lang hi ki khun samla.
Shuh shuh I la ïathuh ba ka Committee ban wad ïa ki san ngut ki dkhot jongka Expert Committee ba la khlieh da u Chief Secretary ruh ka la leh la ka kam bad ngeit skhem ba kin ïoh ïa ki dkhot kiba don ka jingtip bad jingproh ka jingmut jingpyrkhat ha kiba bun ki liang.