Khliehriat jylliew 20: U Addl.Superintendent of Police ka East Jaiñtia Hills, U bah B.Jyrwa, MPS hynne ka sngi ba ar u pyntip ba ki dkhot ka kynhun ïakhun pyrshah drok ka ANTF bad ki pulit ka district ki la ioh ban kurup ïa u kynja uba don ka jingkhia kaba 251.30 kilo, ïa une u ganjs la kurup na kawei ka kali Tata Tigor kaba don ïa u Regn. No. TR-01-BT-0265 najan Khliehriat PS ha kaba la kem noh ruh ïa lai ngut ki briew kiba donkti.
Une u heh pulit u ïathuh ba katei ka kali ka la phet krad bad pynher stet bha na Nongsing Naka kaba la buh jingma ruh ïa ki dkhot ka ANTF kumjuh ïa ki bor pulit ha Naka ha Ningsning, hynrei dri ha ka por 5:45 jan miet ïa kane ka kali la ioh ban bat noh hajan Khliehriat PS bad hadien ka jingkhynra la lapdien ïa ki 57 tylli ki song ba la buhrieh bha.Hadien ba la leh ïa ka test hakhmat ki sakhi ba laitluid la pynthikna ba u dei u kynja.
Hadien ka jingtohkit, la shem ruh ba u trai jong kane ka kali bad une u kynja lem bad laingut ki paralok jong u ki la shong da kawei pat ka kali kaba don ïa u Regn No. TR-01-BW-0231 (Hyundai i20), bad hadien ba la ioh ban bat noh ïa kane ka kali hapoh Kongong, EJHD bad wanlam ïa ki shapoh Khliehriat PS ha kaba la rejistar case bad sdang ban pynlong ka jingtohkit ban lapksai shuh shuh ha kaba ïadei bad kane ka kam khaiï beaiñ.
Kine ki briew kiba la shah kem noh ki kynthup ïa u Joyel Das, Pronoy Mazumdar, Gaurav Gupta, Karnajit Sarkar, Sujit Sarkar, Sunil Sarkar, Tutan Sarkar, Sanjit Sarkar baroh kiba dei na South Tripura.
