Kita kiba nga shaniah, kita ki dung ïa nga nadien, ong u Bah Titos da ka jingjaw ummat

Shillong Jylliew, 19: “Kita kiba nga shaniah, kita ki dung ïa nga nadien,” ong u Bah Titostarwell Chyne da ka durkhmat ba sngewsih bad da ka jingjaw ummat katba u dang jubab halor ka No Confidence Motion ba la wanrah da u MDC jong ka Rambrai-Jyrngam Constituency u Bah Bajop Pyngrope ha ka sngi sdang jong ka Dorbar Lyiur ka Khasi Hills Autonomous District Council (KHADC) ha ka Lah Sngi U Blei.
“Lada para Nongmihkhmat dang ïa shet kylla sa ïa u paidbah lei katno tam, katno sien phin shet kylla ïa ki, hangne tang hapoh 30 ngut dang ïa shet kylla sa ïa u paidbah lei katno sien phin shet kylla” ong u Bah Chyne hapoh ka Ingdorbar hadienba la shah pynkhyllem kum u Chief Executive Member (CEM) jong ka Khasi Hills Autonomous District Council (KHADC).
U la kren siat ruh ïa la ki jong ki paralok kiba don ha syndah jong u da kaba kynnoh ba ki dei ki nongshet kylla ïa u bad u ñiew ba kane ka jingleh jong ki ka long kumba ki doh nakhmat ki dung pat nadien.
“Ki paralok kiba nga ieid tam, kiba nga la theh lut mynta ki dung ïa nga nadien. Nga duwai ba u Blei un pynkylla ïa ka dohnud jong ki paralok ki bym don shuh ïa ka jingïatip lem, ka jingïatiplem jong ki ka la ïap mynta ka sngi hangne, nga u briew ngam lah ban leh eiei hynrei nga la pyndep la ka kamram,” la bynrap u Bah Chyne.
U la kyntu ruh ïa u ban sa shimti thymmai kum u Chief Executive Member (CEM) ba un shim ïa kane ka jingshah shet kum ka jinghikai bad ba un long uba husiar namarba kita kiba doh ki lah ban dei ki ban dung nadien. “Wat shaniah ïano ïano ruh, kin sa dung ïa phi nadien” la maham u Bah Chyne ïa u CEM bathymmai u ban sa shimti. U da ong ruh ba uta u CEM ba thymmai ruh u dei u paralok ba ïa jan jong u (khlem da pynmih kyrteng).
Halor ka jingkylla jong ka saiñpyrthei, u Bah Titos u la pynpaw ïa ka jingsngewlyngngoh ba u MDC na Mylliem Constituency u Bah Ronnie V. Lyngdoh uba dei u Nongïalam jong ka Liang Pyrshah ha Iingdorbar Thawaiñ jong ka Jylla uba pyrshah ïa ka NPP hynrei ha District Council u ai ïa ka jingïatreilang bad ka NPP.
Ha kum kane ka por, u Bah Ronnie V. Lyngdoh u la ieng joit naba shong bad dawa ba ïa kane ka jingkren jong u Bah Chyne dei ban weng na ka rekod jong ka Ingdorbar bad shuh shuh u la kynnoh ba ka jingkren jong u Bah Chyne ka dei ka jingkynthah shimet ïa u.
U Bah Chyne u la pynphai nia da kaba ong, “ka dei ka jingshisha kaba ym lah ban buhrieh.”
Shwa ban pynkut ïa ka jingkren, u la bteng sa shisien da kaba ong, “nga khlem mut ban pynmong ïa phi (Bah Ronnie) hynrei nga shu kren ïa ka jingshisha khnang ba u paidbah un tip ka mut aiu kane ka politik hangne.”