Khliehriat, Jylliew 19 : Mynta ka sngi hadien ba ki bor pulit jongka kynhun ANTF Khliehriat bad ki pulit jongka Lad Rymbai ki la ïoh jingtip kaba thikna ba ki don arngut ki briew kiba dang don ha lynti ban wan rung sha ka jylla da ka kali Tata Winger NL 07T 0815, ki la pynlong ka jingpynap shrip ïa ki hajan Khliehriat ha Umtyra hajan ka Petrol Pump BMS Fuel Station Nongsning kumta ha ka por kumba 6.15 pm ki la ïoh ban bat ïa kitei ki arngut kiba la tip kyrteng kum u M. Tuanbiaklian Guite, 32 snem bad u Imliakum Longkumer,40 snem.
Ha ka jingtalasi ïa ka kali ka kynhun ANTF bad ki Pulit ka Lad Rymbai ki la ïoh ban kurup haduh 200 tylli ki synduk sabon kiba la pyndap da u pawder ba lam stem umsoh niamtra bad ïa kine la thep ha ki bun bynta jongka kali.
Ha ka jingeksamin ïa utei u pawder la lap ba u dei u drok Heroin bad haba la thew ka jingkhia baroh ka long 2.738 kilo. Ki pulit ki la register case ha Khliehriat Police Station bad ka jingtohkit ka dang ïaid shakhmat. Ki pulit ki la ïoh ruh ban kurup ar tylli ki mobile phone, 2500 tyngka ka pisa bad katei ka kali Tata Winger ba ki pyndonkam.
