Shillong, Jylliew 19: Ka Voice of the People Party ha ka sngi Nyngkong ka la ai jingmut sha ka sorkar ba kan siew bai lutksan sha ki nongrim masi kiba la shah ktah ki jynri jong ki na ka jingpang Lumpy Skin Disease ha kaba ka don ka jingïap bad ka jingbym long shuh ka doh bad ka dud jong kine ki jynri ban bam.
Ha ka shithi ba la phah sha u Myntri ka tnat ri jynri ka sorkar jylla u Bah AL Hek, u General Secretary ka VPP uDr Ricky AJ Syngkon, ka VPP ka la ai jingmut ruh ba ka sorkar kan thung da ka kynja komiti da ki doctor mrad ne veterinarian jong ka sorkar jylla bad kumjuh na ki tnat ka sorkar pdeng kum na ICAR na bynta ban eksamin ïa ki masi khnang ban pynthikna ba ki long kiba koit ne ba pang.
“Da ka jingtest ban pynhisha ba ki masi ki long kiba koit ba khlaiñ ka sorkar kan lah ruh ban ai ki syrnot sha ki nongri masi khnang ba kin lah ban die biang ïa ka dud bad ka doh ba ki ïoh na ki jynri jong ki,” ong ka VPP ha ka shithi ba la phah sha ka sorkar.
Ka VPP ka la ai jingmut ruh ba ka sorkar kan wanrah da ki insurance na bynta ki kam ri jynri khnag ba lada jia ba wan lynshop kino kino jingpang ki jynri kan ym ktah ïa ka pla jong ki.
