Pan kaiphot ka Myntri halor ka jingpang ki masi ki sniang bad jinglap formalin ha ki dohkha

Shillong, Jylliew 19: Ka Myntri ka tnat ka koit ka khiah ka sorkar jylla ka Kong Ampareen Lyngdoh ka la pan kaiphot na ka tnat Animal Husbandry & Veterinary department bad ka tnat Fisheries ha kaba ïadei bad ka jingpang ki sniang ha ka jylla bad kumjuh ruh ka jinglap ïa ka jingdon u formalin ha ki dohkha ba wanrah na barjylla.
“Nga la pan ka kaiphot na kine ki tnat ha kaba ïadei bad kane bad haduh katno ngi lah ban pynjari ïa ka jingpyrkhing ïa ka jingdie ïa ka doh ba mih na ki khnang ba kan ym ktah ïa ka koit ka khia u paidbah,” ong ka Kong Ampareen haba kren sha ki lad pathai khubor.
Ka la ong ruh ba ka dei ka kamram jong ka sorkar ban shim ïa ka jingai jingmut na ki tnat bapher bapher kiba lap ba ka don jingma ïa u paidbah lada u bam ïa ka doh ba kum kine.
“Namarkata kane kane ka jingpynmih ka sorkar ïa ka jingmaham ka dei na bynta ka jingmyntoi u paidbah khnag ba un tip kiba kumno ki jingbam kiba biang bad bam na bynta ka koit ka khia bad kino pat kiba buh jingma ïa u,” ka la ong.