Shillong, Jylliew, 19: Arngut ki briew kiba shong ha kawei ka thuk thuk ar shaka ki la mynsaw jur katba uwei pat u la khladnoh hashen ha ka jingïatakhuh ki thuk thuk ha jingkieng Chimesengre. Kane ka la jia ha ka Lah sngi u Blei ha ka por kumba 1:00 baje nohphai sngi.
Katkum u kyrwoh na ki Pulit, la ïathuh ba kawei ka thuk thuk Pulsar Bike kaba don ïa u nombar As 02 G. 0343 ba la ñiah da u Jahangir (25snem) uba sah ha Uttar Samarali, South Salmara, Assam bad uba shong lang hadien ïa uba la tip kyrteng kum u Minarul Islam (26snem) Sukchar District, Dhubri Assam ki dang thmu ban leit sha Garobadha. Ha kane ka por, kawei ka thuk thuk kaba don ïa u nombar ML-14 8862 ba la ñiah da u Dechrang T. Sangma (23sne) uba sah ha Damalgre uba dang wan na Garobadha u la ïatakhuh bad ka thuk thuk ba la shong da kitei ki arngut ynda poi ha jingkieng Chimesenggre.
Ha kane ka jingjia, ki arngut ki la mynsaw jur.
Ki nongtrei ka EMRI-108 kiba la wan poi ban ai jingïarap ki la pyntip ba u Dechrang T Sangma u la khladnoh hashen.
Ïa ki arngut kiba la mynsaw jur la pynkit noh mar mar sha Tura CHC ban ïoh jingsumar, katba ïa ka met jong u Dechrang T. Sangma la pynkit noh sha ka jaka buh metïap ha Ampati DM&HO.
