Da ka Payloader Machine jong ka Star Cement la pynkhuid ïa ka khyndew ha tunel Sonapyrdi

Khliehriat, Jylliew 19: Ka jingtwa ka khydew ktieh hajan ka tunel ha Sonapyrdi ka la buh jingeh haduh katta katta ïa ki nongleit nongwan bad ka jingdheng kali ruh ka la neh la jan shi taiew mynta, hynrei mynta ka sngi da ka jingpyntrei da ki kor ki bor jong ka karkhana dewbilat jong ka Star Cement Company, ka Payloader Machine mynta ïa ka jingtwa la lah ban pynkhuid bad ki kali kiba sahkut ha ka jingdheng kali, mynta ki la lait ban iaid lyngba na katei ka tunel.
Hooid, ym lah ban len, na ka liang ki nongtrei jong ka NHAI ruh ki la ïakhun baroh 24 kynta ban pynkhuid ïa ka khyndew ktieh, hynrei na ka liang ka NHAI ka la phah tang ar tylli ki JCB bad kine kim lah shuh ban tehlakam ïa ka jingsyntuid ka khyndew ktieh nalor lum bad dei da ka jingpyntreilang bad ki kor ki bor ba wan na Star Cement Company mynta ka janmiet la lah ban pynkhuid ïa ka khyndewktieh ha kaba katei ka machine jong ka company ka la khat lut ïa ka kyndew ktieh baroh kaba satah ha ka surok.