Shillong, Jylliew, 19: Ka Dr. Ampareen Lyngdoh kaba long ka Myntri jong ka Sorkar Jylla kaba peit ia ka tnat ka Koit ka Khiah ha ka Lah Sngi U Blei ka la kular hakhmat ki nongialam jong ka Hynniewtrep Youth Council (HYC) West Khasi Hills District ba kan sa leit jurip hi dalade ha ka 26 tarik mynta u bnai ia ki jaka ai jingsumar kiba don hapoh u pud u sam jong ka West Khasi Hills District.
Kane ka jingkular jong ka Myntri ka long hadien ba ka Hynniewtrep Youth Council (HYC) hapoh ka jingialam jong u President ka Seng u Bah Lumlang Kharsyiemlieh ka la pynsngew ia ka jingbym biang jong ka Nongstoiñ Maternity and Child Health Hospital, ki jingduna hapoh ka Nongstoiñ Civil hospital, ki PHC bad ki CHC bad ka jingduna jong ki Staff Nurse.
