Shillong, Jylliew 19 : Ka kynhun ïalehkai jong ka Laitkor SportS Club ki la ïoh ban pynliem haduh 6-0 kol ïa ka Umpling Sports Club ha ka jingïakhun ba nyngkong jong ka SSA Women’s League kaba long hynne ka sngi ha madan Third Ground, Polo.
Ha ka jingïakhun kaba ar pat ka PFR Academy ka la ïoh ban pynliem syndon haduh 16-0 kol ïa ka Mawkriah West Sports Club. Ïa kane ka lympung ïalehkai la wan ban plie pyrda da u Vice President ka SSA, Bah KS Kubarh ryngkat ka jingdonlang u Hony Secretary SS Rapthap, u Assistant Secreatary Bah DL Nongbri bad kiwei kiwei ki dkhot ka Synjuk.Haba phai sha baroh ar tylli ki jingïakhun, baroh ki la noh shilliang namar kim shym la lah satia wat ban pynphai kylla wat tang shi kol ruh.
Ïa ki kol jong ka Laitkor ha kane ka sngi la ïoh ban thep da ka Ïaraplang Nongrum haduh san tylli, kata ha ka minit kaba 2, ba 10, ba 20, 73 bad ka minit kaba 77. Katba ïa kawei pat ka kol la ïoh ban thep da ka Nisilia Majaw ha ka minit kaba 17.
Ka jingïakhun ha kane ka sngi Ba-ar pat kan long hapdeng ka Lumparing Sports Club pyrshah ïa ka Kharang SC ha ka por 2:30 baje mynsngi katba ha ka jingïakhun kaba ar pat kan long hapdeng ka Mawlai SC pyrshah ïa ka Ïasnohktilang FC ha ka por 4:15 baje janmiet.
