Btin lynti ka EPP ïa ki nongïalehkai ka Meghalaya ban kiew stet ha ki kam ïalehkai

Shillong, Jylliew 19 : Ka Meghalaya State Olympic Association (MSOA) ryngkat ka ARMS – PT/EDGE 10 – SPORTALITY, da ka jingïatrei lang bad ka Department of Sports & Youth Affairs ka sorkar jylla, ka la pynbna ïa ka jingsdang ban pyntreikam noh ïa ka Elite Pathway Training 2nd Camp, kaba la long ha ka 17 bad 18 tarik mynta u bnai ha JN Stadium, Polo Shillong.
Ka thong jong katei ka prokram ka long ban pynkylla ïa ka rukom pynmih ïa ki nongïalehkai na kane ka thain kata da kaba sdang ban hikai, pyntbit ïa ki naduh ba dang rit bad buddien haduh ba kin da pura. Katei ka Elite Pathway Program ka long ruh ka bynta ba kongsan jong ka STAR Program, kaba la pynmih da ka sorkar jylla bad pyntreikam pat da ka Edge10 Group, ka kynhun na Australia ryngkat ka Meghalaya State Olympic Association, ban wad bad pyntbit ïa ki riew donsap kiba don ha ka jylla.
Ha katei ka sngi khraw la donlang ruh u Sampat Kumar, IAS, Principal Secretary, Programme Implementation & Evaluation Department, ka sorkar jylla nalor u Ïan Campbell, u rangïalehkai Olympic uba la dep ban mihkhmat ïa ka Australia ha ka 1980 Olympics. Nalorkine la donlang ruh u Bah John F Kharshiing, Working President ka Meghalaya State Olympic Association, Bah PB War Nongbri, Assistant Director jong ka Department of Sports and Youth Affairs, kiba la pashat lang katto katne ki mat ba kongsan. Katba na ka liang u Bah P. Laloo, Joint Secretary ka Meghalaya State Olympic Association bad Kong Isawanda Laloo, Director ka tnad Sports and Youth Affairs, ka sorkar jylla ki la pynpaw ïa ka jingkmen ryngkat ka jingkyrmen ba katei ka jingïatrei lang bad ka EPP kan wanrah ïa u soh ka jingjop.
Na ka liang u Bah John Kharshiing haba kren ha kane ka jingïalang u la ong, “Nga dap da ka jingkmen ban sakhi ïa ka Elite Pathway Program na bynta ki nongïalehkai ka Meghalaya. Kane ka prokram da ka jingïatreilang bad ka MSOA bad ruh ka Edge10 Group, ka la plie lad plie lynti ban lap ïa ki riew donsap bad ruh kumno ban pyntbit ïa ki nongïalehkai. Kane ka prokram ka long ruh kum ka jingsdang jong ka jingkyrmen na bynta ki nongïalehkai ba dang khie da kaba plie ïaka lad ba kin ïoh ïa ki jingkilan met kiba paka ryngkat ka jingdonlang ki nonghikai kiba kynsai. Nga pynpaw ruh ka jingsngewnguh ïa ka jingaiti bad ka jingtbit jong u Ïan Campbell, u nongïalehkai Olympic ba pawnam bad ka kynhun kiba lamkhmat ïa kane ka prokram.”
Ha kajuh ka por u ong ruh ba ki dap ka jingsngewnguh ïa ka jingkyrshan kaba radbah ba ki ïoh na u Myntri Rangbah ka Jylla, Conrad K Sangam bad ruh u Myntri ka tnad Bah Shakliar Warjri kiba da ka jingtrei borbah jong ki ka Meghalaya ka la sdang mynta ban pyni ïa u soh.
Na ka liang u Ian Campbell ha ka jingkren u la ong ba kane ka jylla nalor ba ka don ïa ka mariang kaba ithiang u lap ruh ba ki don bun ki riewdonsap kiba dang khie. “Hadien ba nga la dep ban peit ïa palat 14,500 ngut ki nongïalehkai lyngba ki jingïalehkai ba harukom ha baroh kawei ka jylla, nga sdang ban sngewthuh ïa ka jingbun ki riewdonsap. Ka jingtbit, ka jinglah kaba la don lypa ha ki, ka pyni ïa ka jingkyrmen na ka bynta ka lawei,” u la ong da kaba pynpaw ruh ïa ka jingsngewnguh ïa u Working President ka MSOA bad ka kynhun kiba la shaniah ha u ban pynïaid ïa katei ka kam shakhmat ban lap ïa ki nongïalehkai kiba kynsai bad kiba don ruh ka jinglah ba kin kiew shuh shuh ha ki kam ïalehkai ba bunjait.
Shuh shuh u ong ruh ba ka thong ka long ban lah sei uwei lada ym lah shibun, ïa ki nongïalehkai ban mihkhmat ïa ka jylla ha ki lympung ïalehkai jong ki ri ka pyrthei (International professional athlete) kiban aireng ha ki lympung ïalehkai kiba heh tam ha ka pyrthei.
Lyngba ka EPP ki la don haduh 14,500 ngut ki khynnah kiba la wan ban pyni ïa ka jigntbit jong ki ha kylleng ki bynta jong ka jylla bad na kine ki la don haduh 200 ngut ei ei kiba la shah jied na ka bynta katei EPP. Kine ki nongïalehkai ki don mynta ha ka prokram ba shisnem kaba la phiah ha ki ar bynta kaba kynthup ïa ki jinghikai pyntbit ba ai da ki coach bad ruh ka jingpeitngor kaba man ka taiew ban peit ïa ka jingtbit kaba ki don.
Ka bynta kaba ar pat jong ka EPP ka long ka jingkilan met kaba markhmat ha SAI Centre NEHU hakaba ki nongïalehkai ba la shah jied ki ïoh ïa ka jinghikai hapoh ka jingïalam jong u Ian Campbell bad ka kynhun. Kane ka jinghikai ki ïoh ruh na ki coach ba pawnam da kaba ai nuksa ba ha u Ïaiong 2023 ki nongïalehkai ki ïoh ruh ïa ka jinghikai na u rangïalehkai ba rim ka Manchester United u Jesper Olsen nalor kiwei kiwei ki coach.
Ha kajuh ka por na ka liang ka tnad Ïalehkai ka jylla ka buddien bad peitngor ïa kitei ki nongïalehkai bad ka buh thong ruh ba kitei ki nongïalehkai kin ïoh ïa ka jinghikai kaba paka tam eh.
Nalorkata, ka Mass Talent Identification Program kan ïai bteng ban wad ïa ki nongïalehkai kiba don ïa katei ka jingtbit lypa. Ka tnad ka don ruh ka jingkyrmen ba da ka jingïatrei lang bad ka MSOA ryngkat ka Edge10 Group kin ïoh ban pynwandur shuh shuh ïa ki kam ïalehkai ha kane ka jylla da kaba pynkupbor bad plie lad ïaki nongïalehkai ba kin khie rasong wat ha ki lympung ïakhun jong ki ri ka pyrthei.